АҚШ Беларусда экстремистик нашр деб топилган Nexta интернет-ресурсининг собиқ раҳбари Роман Протасевични озодликка чиқаришни талаб қилмоқда. У Ryanair авиакомпанияси самолётини фавқулодда Минск аэропортига қўндириш орқали ҳибсга олинганди. Бу ҳақда АҚШ давлат котиби Энтони Блинкен маълум қилган, дея хабар берди «Интерфакс».
«АҚШ Евроиттифоққа аъзо икки мамлакат ҳудудидан фавқулодда равишда самолёт рейсининг қайтарилиши ва ҳаво кемаси бортида бўлган журналист Роман Протасевични Минскда ҳибсга олинишини кескин қоралайди. Биз уни зудлик билан озодликка чиқарилишини талаб қиламиз», – дейилади Блинкен баёнотида.
У Лукашенко ҳукумати амалга оширган мазкур кутилмаган ва шубҳали ҳаракат 120 дан зиёд йўловчиси бўлган самолётдаги одамлар ҳаётини ҳам хавф остида қолдиргани ва улар орасида АҚШ фуқаролари ҳам бўлганини қайд этган.
Блинкеннинг айтишича, мустақил ОАВ демократик жамиятнинг асосий шартларидан бири ва қонунийликнинг бирламчи мезонларидан ҳисобланади. Шунингдек, АҚШ давлат котиби Вашингтон Беларусда яна журналистларнинг таъқибга учраши ҳамда ҳибсга олинишини кескин қоралашини айтди.
АҚШ давлат котиби мамлакатнинг Европа иттифоқи давлатларидаги ҳамкорлар, Литва ва Греция расмийлари билан Ryanair самолётининг Беларусга қўндирилгани юзасидан маслаҳатлашувлар ўтказишга тайёр эканлигини билдирди.
Блинкен содир бўлган воқеа юзасидан суриштирув ўтказишга чақирди«Мазкур ҳолатда самолётни фавқулодда қўндиришга мажбурланганини инобатга олиб, Халқаро фуқаролик авиацияси ташкилотидан мазкур ўйланмай қилинган ҳаракат юзасидан тезкор тарзда йиғилиш ўтказишга ва мазкур вазиятлар юзасидан тафтиш бошлашга чақирамиз, бунда уларга амалий кўмак беришга тайёрлигимизни билдирамиз», – деган АҚШ давлат департаменти раҳбари.
Ryanair авиакомпаниясининг самолёти 23 май куни Минскка фавқулодда қўнишни амалга оширган. Самолёт бортида Беларусда экстремистик интернет-ресурс деб тан олинган Nexta’нинг собиқ бош муҳаррири Роман Протасевич Афинадан Вилнюсга йўл олаётган эди. Самолёт қўндирилгач, у ҳибсга олинган.
Литва президентининг ташқи сиёсий масалалар бўйича бош маслаҳатчиси Аста Скайсгиритенинг сўзларига кўра, фуқаролик самолётининг йўналишини ўзгартириш учун МиГ-29 қирувчи самолёти ҳамда Ми-24 ҳарбий вертолётидан фойдаланилган.
Аввал Евроиттифоқ кенгаши раҳбари Шарл Мишел Евроиттифоқнинг 24 майда бўлиб ўтадиган навбатдаги саммитида Ryanair самолётининг Минскка фавқулодда қўнганлиги масаласини муҳокама қилишни таклиф этган.
Шунингдек, АҚШ, Буюк Британия, Германия, Ирландия, Латвия, Литва, Польша ва Чехия давлатлари Беларусь осмонидан учиб ўтишни тақиқлашни талаб қилган.
Изоҳ (0)