Italiyadagi dor yo‘li uzilib, yuk ko‘targich kabina qulab tushishi oqibatida jabrlangan bola kasalxonada vafot etdi. Shu tariqa, halokat qurbonlari soni 14 kishiga yetdi, deb yozadi “RBK”.
ANSA ma’lumotlariga qaraganda, 13 kishi, shu jumladan, ikki yoshli bola voqea joyida halok bo‘lgan. To‘qqiz va besh yoshdagi ikki nafar bola og‘ir ahvolda shifoxonaga olib ketilgan. Keyinroq ularning kattasi vafot etgan.
Kabina qulashi oqibatida jabrlangan to‘qqiz yoshli bola kasalxonada vafot etgani haqida Corriere della sera nashri ham xabar berdi. Besh yoshli bolaning ahvoli og‘ir deb baholanmoqda.
Avariya 23-may kuni yuz berdi. Dor yo‘li uzilib ketishi oqibatida taxminan 20 metr balandlikdan ichida 15 kishi bo‘lgan kabina qulab tushdi. Dastlab 12 kishi halok bo‘lgani xabar berilgan edi.
Mahalliy Rainews24 telekanali xabariga qaraganda, yo‘nalish oxiriga yetay deb qolganida ko‘tarma yo‘l dori uzilib ketgan. Kabina borish qiyin bo‘lgan o‘rmonli joyga qulab tushgan, bu qutqaruv operatsiyasini murakkablashtirgan. Qutqaruvchilar kabinani yerda deyarli butunlay pachoqlanib, ostin-ustun bo‘lgan holda topgan.
Dor yo‘li kabinasining sig‘imi 40 yo‘lovchiga teng.
Dor yo‘li qariyb 1,5 ming metr balandlikdan o‘tgan bo‘lib, Lago Majore ko‘li yaqinida joylashgan Streza aholi punktini Monterone tog‘i bilan bog‘laydi. Dor yo‘li bo‘ylab sayr 20 daqiqa davom etadi.
Yo‘l 1970-yilda ochilgan. So‘nggi marta u 2014—2016-yillarda to‘liq ta’mirdan chiqarilgan.
Izoh (0)