Toshkentning Chilonzor tumanida uch yil avval olib qochilgan Spark topildi. Bu haqda Milliy gvardiya matbuot xizmati xabar berdi.
Ma’lum qilinishicha, 22-may kuni soat 12:00 lar atrofida Chilonzorning “Sharq” mahallasi, Zargarlik ko‘chasida davlat raqamisiz Spark uzoq muddatdan beri turgani aniqlangan.
Avtomashinaning davlat raqami yo‘qligi va old o‘ng tomoni shikastlanganligi Milliy gvardiya xizmatchisida shubha uyg‘otgan. Ushbu qarovsiz avtomashina egasining shaxsiga aniqlik kiritish maqsadida Chilonzor tumani Yo‘l-patrul xizmatiga murojaat qilinganda, ichki ishlar axborot bazasidan kuzov raqami asosida avtomashina egasining shaxsi aniqlangan.
Uning egasi Toshkent shahri, Olmazor tumanida tug‘ilgan 23 yoshli S.M. ekanligi ma’lum bo‘lgach, axborot bazasidagi mobil telefon raqami orqali bog‘lanilib, voqea joyiga chaqirilgan.
Voqea joyiga yetib kelgan fuqaro mazkur avtomobil haqiqatdan ham unga tegishli ekanligini tasdiqlab, 2018-yil 4-mart kuni, taxminan, soat 07:00 lar atrofida Chilonzor tumanidagi Toshkent savdo markazi bozori yonida o‘g‘irlab ketilganini aytgan.
“Avtomashina o‘g‘rilik sodir etgan jinoyatchining qo‘l izlarini olish va uni topishda foydalanish uchun ekspertizaga yuborildi. Albatta, jinoyatchining qilmishlariga tez fursatda qonuniy chora ko‘riladi”, — deyiladi xabarda.
Avvalroq Toshkent viloyatida Lacetti avtomobilini olib qochgan qiz ushlangani ma’lum qilingandi. Shuningdek, Andijon viloyati Izboskan tumanida olib qochilgan Spark ikkita avtomobilga borib urilgani, viloyatning Baliqchi tumanida olib qochilgan Spark Namanganda ehtiyot qismlariga ajratilgan holda topilgani, Farg‘onada sobiq kuyov qaynonasining mashinasini olib qochgani, Xorazmda 63 yoshli otaxon Tico’ni olib qochgani haqida xabar berilgandi.
Izoh (0)