Тошкентнинг Чилонзор туманида уч йил аввал олиб қочилган Spark топилди. Бу ҳақда Миллий гвардия матбуот хизмати хабар берди.
Маълум қилинишича, 22 май куни соат 12:00 лар атрофида Чилонзорнинг «Шарқ» маҳалласи, Заргарлик кўчасида давлат рақамисиз Spark узоқ муддатдан бери тургани аниқланган.
Автомашинанинг давлат рақами йўқлиги ва олд ўнг томони шикастланганлиги Миллий гвардия хизматчисида шубҳа уйғотган. Ушбу қаровсиз автомашина эгасининг шахсига аниқлик киритиш мақсадида Чилонзор тумани Йўл-патруль хизматига мурожаат қилинганда, ички ишлар ахборот базасидан кузов рақами асосида автомашина эгасининг шахси аниқланган.
Унинг эгаси Тошкент шаҳри, Олмазор туманида туғилган 23 ёшли С.М. эканлиги маълум бўлгач, ахборот базасидаги мобил телефон рақами орқали боғланилиб, воқеа жойига чақирилган.
Воқеа жойига етиб келган фуқаро мазкур автомобиль ҳақиқатдан ҳам унга тегишли эканлигини тасдиқлаб, 2018 йил 4 март куни, тахминан, соат 07:00 лар атрофида Чилонзор туманидаги Тошкент савдо маркази бозори ёнида ўғирлаб кетилганини айтган.
«Автомашина ўғрилик содир этган жиноятчининг қўл изларини олиш ва уни топишда фойдаланиш учун экспертизага юборилди. Албатта, жиноятчининг қилмишларига тез фурсатда қонуний чора кўрилади», — дейилади хабарда.
Аввалроқ Тошкент вилоятида Lacetti автомобилини олиб қочган қиз ушлангани маълум қилинганди. Шунингдек, Андижон вилояти Избоскан туманида олиб қочилган Spark иккита автомобилга бориб урилгани, вилоятнинг Балиқчи туманида олиб қочилган Spark Наманганда эҳтиёт қисмларига ажратилган ҳолда топилгани, Фарғонада собиқ куёв қайнонасининг машинасини олиб қочгани, Хоразмда 63 ёшли отахон Tico’ни олиб қочгани ҳақида хабар берилганди.
Изоҳ (0)