Toshkentda kuchli yomg‘ir va momaqaldiroq kuzatildi. Teleminoraga urilgani taxmin qilingan chaqmoq uning uchidagi bayroqni “yondirib yuborgani” aytildi (lekin bu tasdiqlanmadi)

Toshkent shahrida 23-may kuni soat taxminan 19:35 dan so‘ng kuchli yog‘ingarchilik (jala) kuzatildi. Tabiat hodisa shaharning turli hududlarida soat taxminan 21:30 ga qadar davom etgan. Jala vaqtida momaqaldiroq va chaqmoqlar muntazam yuz berdi.

Bunday yorqin tabiat hodisasi ijtimoiy tarmoqlarda, tabiiyki, alohida faollikka sabab bo‘ldi. Telegram’dagi ommabop kanallar poytaxt ko‘chalari kuchli yog‘ingarchilik sabab yana suvga to‘la boshlagani haqidagi videoxabarlarga to‘ldi. Ma’lumotlarga ko‘ra, shaharning ayrim hududlarida do‘l ham yoqqan.

Jala vaqtidagi yuz bergan momaqaldiroq va chaqmoqlarning suratlari va videolari ham ko‘plab e’lon qilindi. Ularning birida chaqmoq go‘yoki Toshkent teleminorasiga urilganini ko‘rish mumkin. Shundan so‘ng tarmoqda teleminora uchidagi O‘zbekiston davlat bayrog‘i yonib ketgani haqida xabarlar tarqaldi.

Biroq keyinroq bu kabi gap-so‘zlar boshqa bir internet-foydalanuvchi tomonidan olingan birgina videoxabar bilan rad etildi – bayroq joyida va avvalgidek hilpirab turibdi. Boshqa rakursdan olingan yana bir videolavhada esa chaqmoq aslida teleminoraga emas, balki uning yonidagi hududga urilgani aks etgan.

Shunga qaramay, Favqulodda vaziyatlar vazirligi matbuot xizmati teleminoraga “haqiqatan ham chaqmoq urilgani”ni, biroq buning oqibatida inshootga shikast yetmaganini, teleminora odatdagi tartibda ishlayotganini ma’lum qildi. Taxminan 1,5—2 soat davom etgan kuchli yog‘ingarchilik poytaxt infratuzilmasiga qanchalik zarar yetkazgani haqida hozircha aniq ma’lumotlar yo‘q.