Tailand armiyasi Kambodja bilan besh kun davom etgan qurolli to‘qnashuvlarda asir olingan 20 nafar kambodjalikning ikki nafarini uyiga qaytardi. Bu kelasi hafta Malayziyada bo‘lib o‘tadigan muhim uchrashuv oldidan tashlangan ijobiy qadam sifatida baholanmoqda.
Tailand va Kambodja o‘rtasida bahsli hududlar sabab yig‘ilib qolgan muammolar 24-iyul kuni qurolli mojaro keltirib chiqardi. Tomonlar og‘ir artilleriya, harbiy aviatsiyani ishga solib, bir-birga zarba berdi. Besh kun davom etgan to‘qnashuvlarda kamida 43 kishi halok bo‘ldi, yana 300 mingdan ortiq tinch aholi uylaridan ko‘chirildi.
Tomonlar Donald Tramp bilan telefon muloqoti, shuningdek, Malayziya vositachiligidan so‘ng o‘t ochishni to‘xtatishga kelishib oldi. Ma’lum qilinishicha, Oq uy urishayotgan tomonlarga ular bilan suvdo muzokaralari to‘xtatilishini aytib, bosim o‘tkazgan.
Tailand ixtiyorida qolayotgan 18 nafar kambodjalik taqdiriga ham oydinlik kiritildi. Bangkokda o‘tgan anjumanda hukumat matbuot kotibi Jirayu Houngsub ularni immigratsiya qonunini buzishda ayblab, asirlar tegishli protseduradan o‘tkazilayotganini bildirdi.
“Kambodja askarlari Tailand hududiga noqonuniy kirgan, armiya ularni qo‘lga oldi va gumanitar tamoyillarga asoslanib muomala qilmoqda”, dedi u.
Kambodja Mudofaa vazirligi esa bayonot chiqarib, barcha askarlarni qaytarishni talab qildi va xalqaro gumanitar huquqqa ko‘ra ular “zudlik bilan va shartsiz ozod qilinishi kerakligi”ni yana bir bor ta’kidladi.
Chegara muammosini bartaraf etishga qaratilgan muzokaralar 4–7-avgust kunlari Malayziyada o‘tkaziladi. Unga ASEAN mamlakatlari, shuningdek, AQSH va Xitoydan harbiy attashelari taklif etiladi.
Izoh (0)