Fransiyalik ikki jurnalist Marokash qiroliga nisbatan tovlamachilik uchun sud oldida javob beradi

Marokash qiroli Muhammad VI ga tovlamachilik qilishda gumonlanayotgan ikki nafar jurnalist sud oldida javob beradi. Bu haqda Agence France-Presse (AFP) nashriga tayanib, “TASS” xabar berdi.

Ma’lumotlarga ko‘ra, 2-fevraldan boshlab hakamlar shantaj qilishda ayblangan Erik Loran va Katrin Grasyega qarshi sud ishlarini olib borish to‘g‘risida ko‘rsatma bergan edi. Shu bilan birga, AFP’ning yozishicha, ulardan qo‘rqitish ayblovlari olib tashlandi.

Jurnalistlar 2015-yilning avgust oyida Parij shahrida qo‘lga olingan. Tergov-surishtiruv ishlari natijasida to‘plangan ma’lumotlarga ko‘ra, ular avval Marokashning Fransiyadagi elchixonasiga qirollik to‘g‘risida va aynan qirol Muhammad VI haqida kitob yozishda yordam berishlarini so‘rab murojaat qilgan. Qirollik uyi vakillari bilan uchrashuv chog‘ida jurnalistlar maqolaning nizoli xarakterga ega bo‘lishiga ishora qilib, 3 million yevro evaziga uni chop etmaslikka va’da bergan.

Marokash diplomatlari Fransiya hukumatiga murojaat qilgach, jurnalistlar bilan Parijdagi kafelardan birida uchrashuv tashkil etishga qaror qilingan. Jurnalistlar kelishilgan pulni olayotganda qo‘lga olingan.

Loran va Grasye Fransiyaning jurnalistik surishtiruvlar bilan shug‘ullanuvchi taniqli jurnalistlari bo‘lib, Loran bank sohasidagi ko‘zbo‘yamachiliklar, neft biznesi, Yaqin Sharqdagi siyosat kabi mavzulardagi bir nechta kitoblar muallifi hisoblanadi. Grasye esa Liviyaning sobiq rahbari Muammar Kaddafiyning prezidentlik saylovlarida Nikolya Sarkozi kampaniyasini moliyalashtirgani ehtimoli to‘g‘risidagi janjalli voqea ustida tekshirish olib borgan.

Har ikki muallif avval ham Marokash mavzusiga murojaat qilib, 2012-yilda Muhammad VI ga juda salbiy tavsif berilgan kitob yozgan edi.