Shimoliy Makedoniya rossiyalik diplomatni hududidan chiqarib yuborishini e’lon qildi

Shimoliy Makedoniya hukumati rossiyalik diplomatni mamlakatdan chiqarib yuborishga qaror qildi. Bu haqda MKD axborot portaliga asoslanib, “RBK” xabar berdi.

“Tashqi ishlar vazirligi ushbu ma’lumotni tasdiqladi hamda Vena konvensiyasining diplomatik aloqalar to‘g‘risidagi 9-moddasiga muvofiq Rossiya Federatsiyasining Shimoliy Makedoniya Respublikasidagi elchixonasi diplomatini persona non grata deb e’lon qilish to‘g‘risida qaror qabul qilindi”, — deya xabar beradi portal.

Ma’lumot uchun, 9-modda mamlakatga har qanday diplomatik xodimni chiqarib yuborish va sabablarini tushuntirmasdan, uni persona non grata deb e’lon qilish huquqini beradi.

Xabarga ko‘ra, 14-may kuni Rossiya elchisi Sergey Bazdnikin Shimoliy Makedoniya TIVga chaqirilib, rossiyalik diplomatlardan biri persona non grata deb e’lon qilingani to‘g‘risida xabardor qilingan.

Qayd etilishicha, elchini chaqirish va unga notalarni taqdim etish diplomatik protokolga muvofiq bo‘lib o‘tgan. MKD ma’lumotlariga ko‘ra, diplomat tez orada mamlakatni tark etishi kerak. Diplomatni chiqarib yuborish qarori so‘nggi kunlarda rossiyalik diplomatlarni persona non grata deb e’lon qilgan ayrim Yevropa mamlakatlari harakatlari bilan bog‘liq yoki yo‘qligi noma’lum bo‘lib qolmoqda.

Rossiyaning Shimoliy Makedoniyadagi elchixonasi diplomatning mamlakatdan chiqarib yuborilishini tasdiqladi. “Biz notani oldik, haqiqatan ham bir nafar diplomatni elchixonamizdan chiqarib yuborishga qaror qilindi. Ayni paytda Rossiya javob choralarni ko‘rib chiqmoqda”, — dedi elchixona matbuot xizmati. Ularning qo‘shimcha qilishicha, diplomat yetti kun ichida mamlakatni tark etishi kerak.