Chexiya hukumati Vrbetitsedagi o‘q-dorilar omborlarida sodir bo‘lgan portlashlarda ayblanayotgan Rossiyadan kamida 1 milliard krona (47 million dollar atrofida) miqdorida tovon puli talab qilmoqchi. Bu haqda respublika moliya vaziri Alena Shillerova Chexiya televideniyesida ma’lum qildi, deb yozadi Meduza.

Foto: Global Look Press

Xabarga ko‘ra, gap o‘q-dorilar portlashidan keyin hududni tozalash uchun budjetdan sarflangan xarajatlarni qoplash to‘g‘risida bormoqda.

“Xalqaro huquqqa muvofiq eng ishonchli yo‘l xalqaro tovondir. Chunki biz zararni deylik jinoiy sud ishi bilan undirish yo‘lini tutsak, bu juda uzoq vaqt talab etadi” ­­— dedi Shillerova.

Chexiya televideniyesi xabariga ko‘ra bir milliard krona ­­— bu faqat dastlabki miqdor, chunki zarar ko‘rgan mintaqaning ma’murlari o‘z da’volarini, shu jumladan, ma’naviy zararni qoplash va mol-mulkdan foydalana olmaslik kabilar uchun kompensatsiya miqdorini oshirishi mumkin. Zararlangan hududlarga tarqalgan o‘q dorilarni tozalash ishlari hali tugallanmagan.

Chexiya tashqi ishlar vaziri Yakub Kulganekning aytishicha, rasmiylar tovon puli olish uchun yaqin hafta yoki oylar ichida murojaat qiladi. Avvalroq u Chexiya Vrbetitsedagi portlashlar natijasida yuzaga kelgan vayronagarchilik uchun Rossiyadan uzr yoki moliyaviy tovon puli talab qilishi mumkinligini aytgan edi, ammo tovon puli miqdoriga aniqlik kiritmagan.

Chexiya parlamenti a’zosi Ondrjey Beneshik Chexiya uchun Rossiyadan tovon puli olish qiyin bo‘lishini, shu bilan birga, jarayonni hech bo‘lmaganda “bunga jim qarab bo‘lmasligini” ko‘rsatish uchun boshlash kerakligini aytgan.

Avvalroq Chexiya bosh vaziri Andrey Babish Yevroittifoq mamlakatlari rahbariyatini Vrbetitse qishlog‘idagi portlashlar haqidagi ish bo‘yicha Chexiya hukumati bilan birdamlik ramzi sifatida hech bo‘lmaganda bir nafardan Rossiya diplomatlarini chiqarib yuborishga chaqirgan edi.

Chexiya Rossiyani 2014-yil 17-aprelda Moraviyaning janubi-g‘arbiy qismidagi o‘q-dorilar omborida sodir bo‘lgan portlashlarga aloqadorlikda ayblaganidan keyin ular o‘rtasidagi keng ko‘lamli siyosiy-diplomatik nizo paydo bo‘ldi. Shundan so‘ng Praga qiymati 6 milliard yevro bo‘lgan “Dukovani” atom elektr stansiyasining yangi energiya blokini qurish bo‘yicha tenderda ishtirok etish uchun “Rosatom” davlat korporatsiyasining nomzodlar safidan chiqarilishini e’lon qildi.

Buning ortidan Chexiya 18 nafar rossiyalik diplomatni mamlakatdan chiqarib yubordi. Bunga javoban Moskva ham 20 nafar chexiyalik diplomatni mamlakatdan chiqarib yubordi.