Yevropa Parlamenti 19-may kuni Yevropa Ittifoqi va Turkiya munosabatlari to‘g‘risidagi ma’ruzani ma’qulladi. Ma’ruzada parlament Turkiyani XX asr boshlarida Usmonlilar imperiyasida sodir etilgan armanlar genotsidini tan olishga chaqirgan, deb yozadi “RBK”.
Hujjatda qayd etilishicha, deputatlar Turkiyaning Gretsiya va Kiprga nisbatan “dushmanona tashqi siyosati”dan, shuningdek, Suriya, Liviya va Tog‘li Qorabog‘dagi mojarolarga aralashuvidan xavotirda, chunki bu Yevropa Ittifoqining ustuvor yo‘nalishlariga zid.
“Ular, shuningdek, Turkiyani armanlar genotsidini tan olishga takror chaqirib, shu orqali turk va arman xalqlari o‘rtasida haqiqiy yarashuvga yo‘l ochilishini ta’kidlaydi”, — deyiladi parlament xabarida.
Hujjatni 480 nafar deputat yoqlagan, 64 nafari unga qarshi ovoz bergan va 150 kishi betaraf qolgan. Parlamentning o‘zi armanlar genotsidini 1987-yilda tan olgan edi.
Yevropa Parlamenti ko‘p yillardan beri Turkiyani armanlar genotsidini tan olishga chaqirmoqda. Xususan, 2015-yilda parlament Yevropa Ittifoqida 24-aprel kunini Armanlar genotsidi qurbonlarini xotirlash kuni deb e’lon qilish to‘g‘risida rezolyutsiya qabul qildi va Anqaraga tegishli murojaat yubordi.
Bunga javoban Turkiya bunday chaqiriqlar Yevropa Ittifoqi bilan munosabatlarning yomonlashuviga olib kelishi mumkinligi haqida ogohlantirdi.
Eslatib o‘tamiz, 24-aprel kuni AQSh prezidenti Jo Bayden XX asr boshlarida Usmonlilar imperiyasida sodir etilgan etnik armanlarning qirg‘inini genotsid deb rasman tan oldi. Anqara Amerika rahbarini populist deb atadi va uning bayonotini rad etdi. Turkiya prezidenti Rajab Toyyib Erdo‘g‘on Baydenning armanlar genotsidi haqidagi bayonotini adolatsiz deb atadi.
Armaniston bosh vaziri Nikol Pashinyan esa Baydenga minnatdorlik bildirib, AQSh mazkur genotsidni tan olganidan keyin tarixda sodir bo‘lgan ushbu fojia o‘z rasmiy tasdig‘ini topganini ta’kidlagan.
Izoh (0)