Checheniston rahbari Ramzan Qodirovni “shayton” deb atab izoh qoldirgan Instagram foydalanuvchisining otasi va qarindoshlari Qodirovdan kechirim so‘radi. Ularning uzri yozilgan ikkita video Grozniy telekanalida namoyish etildi.
Telekanal ma’lum qilishicha, izoh muallifi 15 yoshli Dog‘iston fuqarosi bo‘lib, u otasi bilan Podmoskovye viloyatida yashaydi.
Birinchi videoda ota “15 yoshli o‘g‘lining noto‘g‘ri tarbiyasi uchun” kechirim so‘ragan va “kelajakda o‘g‘lining tarbiyasiga jiddiy e’tibor qaratishga” va’da bergan. Bu vaqtda o‘smir otasining yonida o‘tirgan.
Ikkinchi videoda o‘smirning besh nafar qarindoshi kechirim so‘ragan. “Hurmatli Ramzan Axmatovich, biz bu o‘smirning qarindoshlarimiz, farzandimizning qilmishini chuqur anglab, sizdan va sizning hamrohlaringizdan uzr so‘raymiz”, — dedi erkaklardan biri kameraga qaray olmasdan.
Qodirov Instagram’da 6,7 million obunachiga ega @ya_pomoshnik_kra_95 akkauntidan 17-may kuni jonli efir qilgan edi. Efir davomida u foydalanuvchilardan birining: “Sen odam emassan, shunchaki shaytonsan”, — degan izohini o‘qib, skrinshotga olgan. So‘ng kulib, unga “O‘zing haqingda shaxsiydan yozib yubor. Qani, qaysi birimiz shayton ekanmiz. Shaytonlarning ko‘pini yo‘q qilganman, seni ham yo‘q qilishim mumkin” deb kulgan.
Ramzan Qodirovdan kechirim so‘rash holatlari avval ham bir necha marta kuzatilgan.
Avvalroq bloger Sasha Tileks Checheniston rahbarini parodiya qilgani uchun uzr so‘ragan. Britaniyalik bloger Benjamin (Bald and Bankrupt) esa chechen ayollarini “jonon” deb atagani uchun kechirim so‘ragan.
Hatto Ukraina prezidenti Vladimir Zelenskiy ham Qodirovdan kechirim so‘rashga majbur bo‘lgan. U “Kvartal 95” studiyasi Checheniston rahbarining yig‘lab turgan videosidan foydalangani uchun uzr so‘ragan. Zelenskiyning so‘zlariga ko‘ra, ma’lum bir kishi unga qo‘ng‘iroq qilib, ushbu video haqida qanday fikrdaligini so‘ragan. “Agar biz musulmon olamidan kimnidir din darajasida xafa qilgan bo‘lsak bu o‘ta xunuk holat, chunki din og‘riqli va nozik mavzu”, — degan u.
Grozniy teleradiokompaniyasining direktori va Qodirovning yordamchisi Ahmed Dudayevning so‘zlariga ko‘ra, Checheniston hukumati hech kimni kechirim so‘rashga majburlamaydi, chunki bu qonun bilan taqiqlangan. Ammo agar “kimdir ma’lum bir xalqga xos chegaralarni bilmasa”, u “qandaydir gap aytib qo‘yishi, nimadir qilib qo‘yishi” mumkin, dedi Dudayev. Bunday holda, unga “qadimiy xulq-atvor qoidalariga” ko‘ra u yoki bu harakatlar yoki so‘zlar bilan chechen xalqining obro‘siga putur yetkazib qo‘yilgani tushuntiriladi.
Izoh (0)