Namanganda Nexia bilan to‘qnashgan Damas haydovchisi vafot etdi, undagi 17 yoshli qiz esa tan jarohati olib, shifoxonaga yotqizildi. Bu haqda viloyat IIB matbuot xizmati xabar berdi.
Hodisa 16-may kuni soat 17:40 larda Kosonsoy—Chust—Pop—Navbahor yo‘lining 76 kilometrida Pop tumani “Yuksalish” MFY hududida yuz bergan. Farg‘ona viloyati Buvayda tumanida yashagan 1981-yilda tug‘ilgan fuqaro Damas’ni ishonch qog‘ozi bilan boshqarib borayotib, harakat xavfsizligini ta’minlay olmay, qarama-qarshi yo‘nalishda harakatlanib kelayotgan Pop tumanida yashovchi, 1982-yilda tug‘ilgan fuqaro boshqaruvidagi Nexia-2 bilan to‘qnashgan.
Oqibatda Damas haydovchisi olgan tan jarohati oqibatida shifoxonada vafot etgan hamda shu avtomashinada bo‘lgan yo‘lovchi — Farg‘ona viloyati Buvayda tumanida yashovchi, shu tumandagi maktabning 10-sinf o‘quvchisi bo‘lgan 17 yoshli qiz bosh miya chayqalishi, chap qo‘l bilak suyagining yopiq sinishi tashxisi bilan tan jarohati olib, shifoxonaga yotqizilgan.
Holat bo‘yicha Pop tuman IIB huzuridagi TB tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘lishiga sabab bo‘lishi) bilan jinoyat ishi qo‘zg‘atilgan.
Avvalroq Namanganda Nexia daraxtga urilishi oqibatida bir yo‘lovchi halok bo‘lgani, Farg‘onada yo‘l chetida to‘xtab turgan “ZIL” tirkamasiga borib urilgan Cobalt’dagi bir kishi halok bo‘lgani, Nexia “KamAZ”ga urilishi oqibatida 2 kishi vafot etgani haqida xabar berilgan edi.
Izoh (0)