Andijon viloyatida besh nafar erkak dala shiyponida 18 yoshli kelinni zo‘rlagani, kelinning yaqinlari qonunbuzarlarga chora ko‘rishni so‘rayotgani haqida xabarlar tarqalgan, holat yuzasidan jinoyat ishi qo‘zg‘atilgandi. Ushbu holat Mahalla va oilani qo‘llab-quvvatlash vazirining shaxsiy nazoratiga olingan bo‘lib, hozirga qadar viloyat IIB rahbariyati bilan voqea tafsilotlari bo‘yicha doimiy muloqot olib borilmoqda.
Vazirlik matbuot xizmatining ma’lum qilishicha, holat tasdiqlanadigan bo‘lsa, sud jarayonlarida vazirlik tomonidan malakali advokat yollanadi hamda suddan jinoyatchilarga nisbatan qonunchilikda belgilangan eng og‘ir jazo tayinlanishi so‘raladi.
“Mahalla va oilani qo‘llab-quvvatlash vazirligi mazkur jihatlarni inobatga olgan holda mavzuga oid qonun normalari hamda aybi isbotlangan jinoyatchiga nisbatan javobgarlikni keskin kuchaytirish bo‘yicha Oliy Majlis Senatiga o‘zining asosli takliflarini kiritdi. Shuningdek, kelgusida bunday salbiy holatlarning oldini olish, ayollarning huquqiy savodxonligini oshirish bo‘yicha vazirlik tomonidan tegishli chora-tadbirlar muntazam davom ettiriladi”, — deyiladi xabarda.
Ayni vaqtda Mahalla va oilani qo‘llab-quvvatlash vazirining birinchi o‘rinbosari Gulnora Marufova boshchiligidagi ishchi guruh a’zolari mahalliy hokimlik vakillari bilan birgalikda Andijon tumaniga borib, jabrlanuvchi bilan ko‘rishib, suhbatlashgan. Ta’kidlanishicha, unga barcha zaruriy, xususan, psixologlar yordami ko‘rsatilmoqda.
Ma’lumotlarga ko‘ra, 2021-yilning shu vaqtiga qadar Zo‘rlik ishlatishdan jabr ko‘rgan shaxslarni reabilitatsiya qilish va moslashtirish markazlariga murojaat qilgan 2437 nafar fuqaroning 1156 nafariga psixologik, 1026 nafariga huquqiy, 77 nafariga tibbiy yordamlar ko‘rsatilgan 11 300 nafariga “Himoya orderi” berilgan.
Eslatib o‘tamiz, ijtimoiy tarmoqlarda tarqalgan xabarda Andijon viloyatida 5 oylik kelinchak dala shiyponida idishlarni yuvish uchun chiqqanida spirtli ichimlik ta’sirida bo‘lgan besh kishi tomonidan qo‘l-oyog‘ini bog‘lab, zo‘rlangani aytilgan. Holat yuzasidan viloyat prokuraturasi bayonot berib, tegishli ekspertizalar tayinlangani, tergovga qadar tekshiruv harakatlari davom etayotganini bildirgan. Bosh prokuratura matbuot xizmati holat bo‘yicha qo‘shimcha ma’lumotlarni taqdim etib, ayolni zo‘rlaganlikda besh emas, balki olti kishi gumon qilinayotgani, ularning barchasi Andijon tumanida yashashini ma’lum qilgandi.
Izoh (0)