Andijon shahrida Motamsaro ona haykaliga hurmatsizlik qilgan 37 yoshli erkak javobgarlikka tortildi. Bu haqda “Yoshlar” telekanalida ma’lum qilindi.
Ijtimoiy tarmoqlarda 3 nafar farzandi bor 37 yoshli Z.Q. ismli fuqaro haykal ustiga chiqib yotib olgani tasvirlangan video tarqaldi. “Onaxonning quchog‘ida yotibman... Kimligini bilmayman, sen taniysanmi? Men ham tanimayman”, — deydi u.
Ushbu fuqaroga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) bilan 15 sutka ma’muriy qamoq jazosi tayinlangan.
Ma’lum bo‘lishicha, bu Z.Q. tomonidan sodir etilgan ikkinchi huquqbuzarlik hisoblanadi. Bundan oldin u harakatlanayotgan poyezd ostiga yotib olgani tasvirlangan videoni internetda tarqatgan edi. Erkak qilgan ishidan uzr so‘rab, qayta bunday ish qilmaslikka va’da bergan.
“Bundan buyog‘iga yaxshi odam bo‘lib, yaxshi hayotda yashashga harakat qilaman. O‘ylamagan xatti-harakatim shunaqa vaziyatga olib keldi. Yoshlarga bu ibrat bo‘lsin. Xalqimizdan kechirim so‘rayman, uzr”, — deydi u.
E’lon qilingan kadrlardan ko‘rish mumkinki, huquqbuzar erkak haykalni artib, atrofini tozalab qo‘ygan.
Avvalroq Kattaqo‘rg‘on bog‘ida joylashgan Alisher Navoiy haykali oldida nojo‘ya harakat sodir etgani aks etgan video tarqalgandi. Keyinroq haykalga tupurgan yigit uning oyog‘ini kiyimlari bilan tozalagan. 11-may kuni xuddi shu joyda noo‘rin xatti-harakatlar qilgan TikTok foydalanuvchisi 15 sutkaga qamalgani haqida xabar berilgandi.Shuningdek, Buxoroda TikTok uchun drift qilgan haydovchining “Jiguli”si jarima maydoniga joylashtirilgani, samarqandlik ikki yigit TikTok’da layk yig‘ish uchun o‘zini tomdan tashlagani hamda harakatlanayotgan Spark ustiga chiqib olgan yigit videosini TikTok’ka joylashtirganlar jarimaga tortilgani haqida xabar berilgandi.
Izoh (0)