Xalq deputatlari Andijon shahar kengashining 17-may kuni o‘tkazilgan navbatdagi sessiyasida deputatlar tintuvdan o‘tkazilgani, ushbu sessiyada Andijonda yer sotuvchilarning kirdikorlarini fosh qilib yurgan deputatni prokuror taqdimnomasiga ko‘ra daxlsizlik huquqidan mahrum qilingani haqida xabar berilgan edi. Mazkur holat Oliy Majlis Senatining Mahalliy hokimiyat vakillik organlari faoliyatiga ko‘maklashuvchi komissiyasi tomonidan nazoratga olindi.
Internetda tarqalgan xabarlar ko‘ra, ushbu sessiyasida xalq deputatlari Andijon shahar kengashi ayrim deputatlarining daxlsizlik huquqiga rioya qilinmaganligi qayd etilgan.
Unda Andijon shahar kengashi deputatini daxlsizlik huquqidan mahrum qilish bo‘yicha prokuror taqdimnomasi dastlab “Reglament va deputatlik odobi” masalalari bo‘yicha doimiy komissiyada ko‘rib chiqilmasdan sessiya kun tartibiga kiritilgani, sessiya materiallari deputatlarga tanishib chiqish uchun oldindan taqdim etilmaganligi, sessiya ochiq oshkora o‘tkazilmaganligi ta’kidlangan.
Senat matbuot xizmatining ma’lum qilishicha, holat Mahalliy hokimiyat vakillik organlari faoliyatiga ko‘maklashuvchi komissiya tomonidan nazoratga olingan, hozirda o‘rganish ishlari olib borilmoqda.
“O‘rganish natijalari to‘g‘risida qo‘shimcha ma’lumot beriladi”, — deyiladi xabarda.
Avvalroq Korrupsiyaga qarshi kurashish agentligi prokurorning bunday harakatini “oqlab bo‘lmasligi”ni ma’lum qilib, prokuror korrupsiya holati haqida xabar bergan shaxsni himoya qilishi kerakligini ta’kidlagandi.
Milliy gvardiya ma’lumotlariga ko‘ra, Andijon shahar hokimining topshirig‘iga asosan sessiya ishi boshlangunga qadar Andijon shahar IIB, shahar prokuraturasi va hokimligidan ajratilgan mas’ul xodimlar kuzatuvi ostida qo‘riqlash xodimi tomonidan tashrif buyurgan sessiya qatnashuvchilari metallodetektor yordamida ko‘rikdan o‘tkazilgan va uyali aloqa hamda ovozli videoga oluvchi vositalarini qoldirib kirishlari talab etilgan.
Izoh (0)