Xalqaro kosmik stansiya (XKS)dagi Amerikaning Tranquility modulida suv chiqarish uskunalari ishlamay qoldi. Bu haqda NASA agentligiga tayanib “Interfaks” xabar berdi.
“Tranquility modulidagi texnik suvni qayta ishlash bloki (WPA) ehtimoliy sizib chiqish sababli buzilgan”, — deyiladi xabarda.
Aniqlik kiritilishicha, ushbu uskuna XKS ekipaji a’zolari uchun bir nechta manbalardan suvni toza ichimlik suviga aylantirish uchun ishlatiladi.
Ta’kidlanishicha, ekipajga hech narsa xavf solmayapti, chunki ularda ehtiyoj paydo bo‘lganda bir necha oyga yetadigan suv zaxirasi bor.
Stansiya bortida uskunani ta’mirlash uchun kerak bo‘ladigan ehtiyot qismlari mavjud. Ta’mirlash ishlari keyingi haftaning boshida yakunlanishi kutilmoqda.
Ma’lumot uchun, 24-aprel kuni XKSga tutashgan Amerikaning SpaceX kompaniyasiga tegishli Crew Dragon-2 ko‘pmartalik kemasining astronavtlari stansiyaning bortiga o‘tdi va ularning kelishi bilan stansiya ekipaji a’zolarining soni 11 nafarga yetdi.
Shuningdek, amerikalik astronavtlar Viktor Glover va Maykl Xopkins 13-mart kuni ta’mirlash-montaj ishlarini bajarish uchun XKS bortidan ochiq koinotga chiqqan edi.
Izoh (0)