AQSh prezidenti Jo Bayden Isroil bosh vaziri Binyamin Netanyaxu bilan telefon orqali muzokara o‘tkazganini ma’lum qildi, deb yozadi “RBK”.
Amerika rahbarining aytishicha, AQSh Isroil-Falastin mojarosining tezroq tugashiga umid qilmoqda.
“Umid qilamanki, nizo tugaydi. Mojaroning keyinroq emas, balki tez orada tugashi maqsadga muvofiq bo‘ladi”, — dedi Bayden. Shuningdek, Bayden ushbu vaziyatda Isroil “o‘zini himoya qilishga haqli” ekanini qo‘shimcha qildi.
Isroil-Falastin o‘rtasidagi nizo 7-may oqshomida keskinlashdi. To‘qnashuvlar Sharqiy Quddusning ikki hududida: Ma’bad tog‘i yaqinida va “Shayx Jarroh” mahallasida sodir bo‘lgan. Isroil sudi qarori bilan u yerdagi bir qator arab oilalarining chiqarib yuborilayotgani noroziliklarga sabab bo‘lgan. 10-may kuni Ma’bad tog‘idagi al-Aqso masjidida politsiya bilan to‘qnashuvlarda 280 ga yaqin falastinlik jarohat olgani haqida xabar berildi. Al-Aqso masjidi yaqinidagi tartibsizliklar fonida yong‘in kelib chiqdi.
Isroil politsiyasi va falastinliklar o‘rtasidagi to‘qnashuvlardan so‘ng G‘azo sektorini nazorat qiluvchi HAMAS guruhi Isroil hududiga raketa hujumlarini boshladi. Bunga javoban Isroil harbiy havo kuchlari Falastin hududlariga aviazarbalar yo‘lladi. Mazkur hujumlar oqibatida 12-may holatiga ko‘ra, 40 kishi — G‘azoda 35, Isroilda besh kishi halok bo‘ldi.
Izoh (0)