Халқаро космик станция (ХКС)даги Американинг Tranquility модулида сув чиқариш ускуналари ишламай қолди. Бу ҳақда NASA агентлигига таяниб «Интерфакс» хабар берди.
«Tranquility модулидаги техник сувни қайта ишлаш блоки (WPА) эҳтимолий сизиб чиқиш сабабли бузилган», — дейилади хабарда.
Аниқлик киритилишича, ушбу ускуна ХКС экипажи аъзолари учун бир нечта манбалардан сувни тоза ичимлик сувига айлантириш учун ишлатилади.
Таъкидланишича, экипажга ҳеч нарса хавф солмаяпти, чунки уларда эҳтиёж пайдо бўлганда бир неча ойга етадиган сув захираси бор.
Станция бортида ускунани таъмирлаш учун керак бўладиган эҳтиёт қисмлари мавжуд. Таъмирлаш ишлари кейинги ҳафтанинг бошида якунланиши кутилмоқда.
Маълумот учун, 24 апрель куни ХКСга туташган Американинг SpaceX компаниясига тегишли Crew Dragon-2 кўпмарталик кемасининг астронавтлари станциянинг бортига ўтди ва уларнинг келиши билан станция экипажи аъзоларининг сони 11 нафарга етди.
Шунингдек, америкалик астронавтлар Виктор Гловер ва Майкл Хопкинс 13 март куни таъмирлаш-монтаж ишларини бажариш учун ХКС бортидан очиқ коинотга чиққан эди.
Изоҳ (0)