Rossiyaning Blagoveshensk shahridagi 27-sonli maktabda 13-may kuni ehtimoliy favqulodda holat sababli darslar vaqtincha to‘xtatildi. Bu haqda “Amurskaya pravda” gazetasi xabar berdi.
Gazetaning yozishicha, darslarning to‘xtatilishiga Tambov tumanida yashovchi 17 yoshli o‘quvchi tomonidan ijtimoiy tarmoqlarda qoldirilgan xabar sabab bo‘lgan.
Qozon shahridagi maktabga qilingan hujumga oid video ostidagi izohlarda “Xudo sizga hakam” niki ostida xabar qoldirgan o‘smir “Ertaga Blagoveshenskning 27-maktabida men ham shunday qilaman” deb yozgan.
O‘smir zudlik bilan hibsga olindi. U tergovchilarga “shunchaki hazillashganini” aytgan.
Ichki ishlar vazirligining Amur viloyati bo‘yicha boshqarmasi o‘quvchiga qarshi terrorchilik harakati to‘g‘risida qasddan yolg‘on xabar berish moddasi bilan jinoiy ish qo‘zg‘atdi. Jinoyat kodeksining 207-moddasi 2-qismiga binoan, u besh yilgacha ozodlikdan mahrum etilishi mumkin.
Blagoveshenskdagi 27-maktabda hech qanday portlovchi vosita topilmadi. Tekshiruv davomida o‘quvchilar uylariga jo‘natib yuborildi.
Eslatib o‘tamiz, Qozonda 11-may kuni 19 yoshli talaba Ilnaz Galyaviyev o‘zi avval ta’lim olgan 175-maktabga qurolli hujum uyushtirdi. U maktabga bir oy oldin qonunan sotib olgan Hatsan Escort quroli bilan kelib, qo‘lbola bombani portlatdi va o‘quvchilarga qarata o‘q uzdi. Natijada yetti nafar o‘quvchi va ikki nafar yoshi katta fuqaro halok bo‘ldi, jarohatlanganlar soni 20 dan oshdi. Shundan keyin Galyaviyev o‘z xohishi bilan politsiyaga taslim bo‘ldi. Jinoyat sodir etilishidan oldin u Telegram kanali ochib, unda o‘zini “Xudo” deb atadi va “dunyoda tirik jonzotlar bo‘lmasligi kerak, bu borliqning xatosi” deb yozdi.
Shundan so‘ng 12-may kuni Qrimning Qizil gvardiya tumanida ijtimoiy tarmoqlarda mahalliy litseyni portlatish tahdidi bilan post qoldirgan erkak hibsga olindi. Qrim huquq-tartibot organlarining ma’lumotlariga ko‘ra, qonunbuzar shu yo‘l bilan maxsus xizmatlarning faoliyatini tekshirib ko‘rmoqchi bo‘lgan.
Izoh (0)