Turkmanistonda Vazirlar Mahkamasining 7-may kuni bo‘lib o‘tgan yig‘ilishida prezident Gurbanguli Berdimuhamedov bosh vazir o‘rinbosarlariga “Mening oppoq shahrim — Ashxobod” nomli yangi kitobi ustidagi ishlarni yakunlaganini aytdi. Bu haqda TDH davlat axborot agentligiga tayanib, “Xronika Turkmenistana” xabar berdi.
Xabarga ko‘ra, Turkmaniston poytaxtining 140 yilligiga bag‘ishlangan mazkur kitobda shahar tarixi, geografiyasi, shuningdek, Ginnesning rekordlar kitobiga kiritilgan ko‘plab inshootlar tasvirlangan.
Prezident bosh vazirning qurilish-sanoat kompleksi bo‘yicha o‘rinbosari Shamuxammet Durdiliyev, tashqi ishlar vaziri Rashid Meredov, bosh vazirning madaniyat va ommaviy axborot vositalari bo‘yicha o‘rinbosari Mexrijamol Mammedova, shuningdek, Davlat xavfsizlik kengashi kotibi Chorimurat Omanovga yubiley boshlanishiga qadar, ya’ni 25-maygacha kitob taqdimotini o‘tkazish to‘g‘risida ko‘rsatma berdi.
Davlat rahbari ushbu asar qiziqarli va foydali bo‘lishiga va Ashxobodning yubileyiga yurtdoshlarga sovg‘a bo‘lishiga umid bildirdi. Uchrashuv yakunida kitob bosh vazir o‘rinbosarlari tomonidan qabul qilindi.
Prezidentning navbatdagi kitobni yozayotgani haqida 22-mart kuni Turkmaniston prezidentining Axaltekin ot majmuasiga tashrif buyurib, yangi tug‘ilgan toychoqqa poytaxt yubileyi sharafiga Ashxobod nomini berganida ma’lum bo‘lgan edi. Majmuada Berdimuhamedov yangi kitobga kiritiladigan “Mening oppoq shahrim — Ashxobod” she’rini poytaxtga bag‘ishlaganini aytgan.
Bu prezidentning 54-asari. Bundan avvalgi “Turkmanlarning ma’naviy dunyosi” kitobi taqdimoti 2020-yil sentabr oyida bo‘lib o‘tgan. O‘shandan beri u xitoy, yapon, rus, gruzin, ukrain va o‘zbek tillariga tarjima qilib kelingan.
Avvalroq Turkmaniston parlamenti “Xizmat ko‘rsatgan itboqar” va “Xalq itboqari” faxriy unvonlarini ta’sis etish to‘g‘risidagi qonun loyihalarini qabul qilgani haqida xabar berilgandi. 21-aprel kuni Gurbanguli Berdimuhamedov o‘z o‘g‘lini “Turkmanistonda xizmat ko‘rsatgan itboqar” unvoni bilan taqdirladi.
Bundan tashqari, Berdimuhamedov Turkmaniston poytaxtining yubileyi kuni tug‘ilgan birinchi chaqaloqqa Ashxobod deb ism qo‘yishni buyurgan edi. Shuningdek, u teatrlarda “xalqning baxtli hayoti” to‘g‘risidagi spektakllar yo‘qligi sabab madaniyat vaziriga hayfsan bergan.
Izoh (0)