Afg‘onistonda “Tolibon” harakati musulmonlarning muqaddas oyi — Ramazon yakunida nishonlanadigan hayit bayrami munosabati bilan uch kun davomida harbiy harakatlarni to‘xtashini e’lon qildi. Bu haqda g‘arb OAVga tayanib, “Interfaks” xabar berdi.
OAV xabariga ko‘ra, “Tolibon” qo‘mondonligi 10-may, dushanba kuni mamlakatda uch kun davomida hujum operatsiyalarini to‘xtatish to‘g‘risida buyruq chiqardi.
Bunga javoban Afg‘oniston Milliy sulh bo‘yicha Oliy Kengashi raisi Abdulla Abdulla mamlakatda doimiy ravishda amal qiladigan tinchlik bitimi tuzish zarurligiga ishora qildi.
“Biz mamlakatni inqirozdan olib chiqishning eng yaxshi yechimi — tinchlik muzokaralari yo‘lidagi g‘ovlarni olib tashlash, uzoq muddatli sulh e’lon qilish va janglarni abadiy to‘xtatish deb o‘ylaymiz”, — deya Abdullaning so‘zlarini keltiradi OAV.
Shuningdek, OAV 2020-yili ham “Tolibon” Ramazon hayiti munosabati bilan uch kunlik sulh e’lon qilganini eslatmoqda.
Bir hafta oldin “Tolibon” guruhi Gilmendning ma’muriy markazi — Lashkargax shahri yaqinida hujum uyushtirgan. Jangarilar dastlab harbiylarni siqib chiqarishga muvaffaq bo‘lgan, keyin havo hujumi yordamida qarshi hujumni boshlagan.
Avvalroq Afg‘onistonning Zabul viloyatida mina qo‘yilgan yo‘ldan o‘tayotgan yo‘lovchi avtobusining portlashi oqibatida kamida 16 kishi halok bo‘lgani haqida xabar berilgandi.
Bundan avval, 8-may kuni Kobuldagi qizlar maktabida bir nechta portlashlar sodir etilgan edi. So‘nggi ma’lumotlarga ko‘ra, hodisada 68 kishi halok bo‘lgan, aksariyati 11-15 yoshdagi o‘quvchi qizlar.
Afg‘oniston prezidenti Ashraf G‘ani Kobuldagi portlashda “Tolibon” jangari guruhini aybladi. Ayni vaqtda “Tolibon”ning o‘zi ham ushbu hujumni qoraladi.
Eslatib o‘tamiz, aprel oyida AQSh prezidenti Jozef Bayden Afg‘onistondan Amerika qo‘shinlarini olib chiqib ketish boshlanganini e’lon qilgan edi. Uning so‘zlariga ko‘ra, harbiylar mintaqada ularning oldiga qo‘yilgan barcha maqsadlarga erishgan. Qurolli kuchlar 11-sentabrgacha to‘liq chiqarib ketilishi rejalashtirilgan. Amerika va NATO mamlakatlari qo‘shinlari 29-apreldan chiqib ketishni boshlagan.
Oq uy Amerika prezidentining ma’muriyati Tinch okeani yo‘nalishiga e’tiborni jamlashni rejalashtirayotganini aytdi. Ayni vaqtda AQSh davlat kotibi Entoni Blinken Afg‘onistondan qo‘shinlar chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmadi.
Izoh (0)