Shotlandiyadagi parlament saylovlarida mustaqillik tarafdorlari ko‘pchilik ovozni qo‘lga kiritdi. Ular Buyuk Britaniyadan ajralib chiqish bo‘yicha referendum o‘tkazishni rejalashtirmoqda

Shotlandiyada 6-may kuni bo‘lib o‘tgan parlament saylovlari natijalarini sarhisob qilish yakunlandi. Parlamentdagi o‘rinlarning aksariyatini hukmron Shotlandiya milliy partiyasi vakillari va ularning maslakdoshlari bo‘lgan “Yashillar” egallab turadi.

Birgalikda ular 129 mandatdan 72 tasini qo‘lga kiritdi. Shunday bo‘lsa-da, BBC News ta’kidlashicha, bu siyosatshunoslar kutganidan yomonroq natija.

Hukumatni boshqaradigan Shotlandiya milliy partiyasi rahbari Nikola Sterjen Britaniyadan mustaqil bo‘lish uchun referendum o‘tkazilishini aytdi —  bu yetti yil ichida ikkinchi referendum bo‘ladi. Shu bilan birga, Sterjen referendumga tayyorgarlik jarayoni koronavirus pandemiyasi tugamasdan boshlanmasligini aytdi.

Shunga qaramay, hukumat rahbari Shotlandiya aholisi o‘z huquqlaridan hamda referendumda ovoz berish imkoniyatidan foydalanishi kerakligini ta’kidladi. “Buni amalga oshirish uchun sudga murojaat qilish bema’nilik bo‘ladi, ammo Shotlandiya rasmiylari voqealarning bunday tus olishiga tayyor”, — dedi Sterjen.

Shuningdek, 9-may kuni London meri lavozimi uchun o‘tkazilgan saylov natijalari ma’lum bo‘ldi. Ovoz berish natijalariga ko‘ra, Sodiq Xon ushbu lavozimda qoldi. Twitter’da u “barcha londonliklarga mer” bo‘lishda davom etishiga va’da berdi. Xonning asosiy raqibi konservatorlardan ko‘rsatilgan nomzod Shon Beyli edi.

Sodiq Xon 2016-yildan beri London meri lavozimida ishlab kelmoqda. London meri uchun saylovlar 2020-yilda o‘tkazilishi kerak edi, ammo pandemiya sababli keyinga qoldirildi va shunga ko‘ra, Xonning vakolat muddati bir yilga uzaytirildi.

Shotlandiya 2014-yilda Buyuk Britaniyani tark etish uchun referendum o‘tkazgan, o‘shanda saylovchilarning aksariyati Britaniya tarkibida qolish uchun ovoz bergan. 2016-yilda Buyuk Britaniyada Yevropa Ittifoqidan chiqish bo‘yicha referendum bo‘lib o‘tdi, unda mamlakat aholisining aksariyati Brexit’ni qo‘llab-quvvatladi, Shotlandiya esa Yevropa Ittifoqida qolish uchun ovoz berdi. Ushbu referendumdan so‘ng Shotlandiya hukumati mustaqillik to‘g‘risida yangidan ovoz berish zarurligini e’lon qildi.