Jons Hopkins universiteti ma’lumotlariga qaraganda, dunyoda koronavirusni yuqtirib olganlar soni 158 355 838 kishiga yetdi. Ushbu ko‘rsatkich bo‘yicha doimgidek AQSh (32,7 million), Hindiston (22,6 million), Braziliya (15,1 million), Fransiya (5,8 million) va Turkiya (5 million) yetakchilik qilmoqda. Global o‘limlar soni esa 3 293 719 kishini tashkil qilmoqda.
Germaniyada emlangan fuqarolar cheklovlardan ozod etildi
COVID-19’ga qarshi vaksina olgan Germaniya fuqarolari 9-may, yakshanbadan boshlab mamlakatda xavfsizlik choralari sifatida amal qilib kelayotgan ko‘p sonli cheklovlardan ozod etildi.Emlanganlar, shuningdek, koronavirusdan keyin sog‘ayganlar endi ijtimoiy aloqalar soni bo‘yicha cheklovga rioya qilishi shart emas, shuningdek, endi ularga komendantlik soati taalluqli bo‘lmaydi. Go‘zallik salonlarida va boshqa servislarda ulardan manfiy javobli PZR-test boshqa talab qilinmaydi.
Bundan tashqari, bu toifadagi fuqarolar mamlakatga qaytib kelganidan keyin majburiy karantinni o‘tashi kerak bo‘lmaydi (agar ular koronavirus mutatsiyalari tarqalishi xavfi yuqori bo‘lgan mamlakatlar bo‘lmasa).
Ammo do‘konlarda, transportda va boshqa jamoat joylarida niqob taqish majburiyati saqlanib qoladi.
Mamlakatning ko‘plab hududlarida kasallanganlar soni pasayishi tufayli, ko‘plab federal shtatlar hukumatlari yaqin haftalar ichida cheklovlarni yumshatishni ko‘rib chiqmoqda. Masalan, Germaniyadagi eng qat’iy cheklovlar joriy qilingan joylardan biri — Bavariyada 10-maydan restoran, teatr, kinoteatr va pivo bog‘lari, 21-maydan esa mehmonxonalar, kempinglar va dam oluvchilarga ijaraga berish uchun kottejlar ochiladi.
Turkmaniston Hindistonga gumanitar yordam yuboradi
Turkmaniston prezidenti Gurbanguli Berdimuhamedov 8-may kuni hukumatga koronavirus bilan bog‘liq murakkab vaziyat tufayli Hindistonga gumanitar yordam yuborishni topshirdi. Yuk nimalardan iborat bo‘lishi va u qancha muddatda yuborilishiga aniqlik kiritilmadi.Hindistonda koronavirus tarqalishi bilan bog‘liq vaziyat aprel oyida keskin yomonlashdi. 7-may kuni bir kecha-kunduzda mamlakatda 414 188 kishi COVID-19’ga chalingan edi, bu esa rekord ko‘rsatkich hisoblanadi.
Bundan avval Turkmaniston Rossiya va Afg‘onistonga ham tibbiy gumanitar yordam yuborgan edi.
Hukumat qayd etishicha, Turkmanistonning o‘zini pandemiya chetlab o‘tgan. Mamlakatda koronavirusga chalinish bilan bog‘liq birorta ham holat aniqlanmagan.
Mavzuga doir: Hindistonda COVID-19’ga chalinish bo‘yicha yangi rekord o‘rnatildi. Qozog‘iston mamlakatga yordam yuboradi
Ruminiya hukumati Drakula qasrida COVID-19’ga qarshi vaksinatsiya markazini ochdi
Transilvaniyadagi Drakula qasrida koronavirusga qarshi vaksinatsiya markazi tashkil qilindi. Oq xalatlariga vampirlarga xos qoziqtish tasvirlari tushirilgan tibbiyot xodimlari Munteniya va Transvilvaniya chegarasida joylashgan XIV asrga taalluqli Bran qasriga tashrif buyuruvchilarga Pfizer/BioNTech vaksinasi bilan emlanishni taklif qilmoqda. Qasrda emlanganlarning barchasiga maxsus “Bran qasrida emlangan odam diplomi” va O‘rta asrga xos qiynoq asboblari ko‘rgazmasiga bepul chipta beriladi.Pandemiya boshidan buyon Ruminiyada bir milliondan oshiqroq odam koronavirusga chalingan, qariyb 29 ming odam vafot etgan.
Mamlakat hukumatining ma’lum qilishicha, sentabrgacha 10 million kishini emlash rejalashtirilmoqda, ammo ruminiyaliklarning deyarli yarmi emlanmoqchi emas, shu tariqa Ruminiya Yevropa mamlakatlari orasida vaksinalarga qarshi shubhali kayfiyat eng kuchli bo‘lganlaridan biri bo‘lib turibdi.
Izoh (0)