O‘zbekiston 2021-yilda Xalqaro mehnat tashkilotining kamida yana ikkita — “1952-yilgi Onalikni muhofaza qilish konvensiyasini qayta ko‘rib chiqish” (№183) va “Mehnat xavfsizligi va gigiyenasiga ko‘maklashuvchi asoslar to‘g‘risida”gi (№187) konvensiyalarni ratifikatsiya qilishni rejalashtirmoqda. Bu haqda 7-may kuni bandlik va mehnat munosabatlari vaziri Nozim Husanovga tayanib, “Gazeta.uz” xabar berdi.
7-may kuni Mehnat vazirligi birinchi bor “O‘zbekistonda mehnat huquqlari himoyasini kuchaytirish” to‘g‘risidagi yillik hisobotini e’lon qildi. O‘zbekiston ayni vaqtda Xalqaro mehnat tashkilotining (XMT) 16 ta konvensiyasini ratifikatsiya qilgan, jumladan, ularning sakkiztasi asosiy hisoblanadi.
Shuningdek, vazir joriy yilda O‘zbekiston Mehnat kodeksining yangi tahrirda qabul qilinishi va 2030-yilgacha ish bilan ta’minlashning milliy strategiyasi tasdiqlanishini o‘z idorasining ustuvor vazifalari qatoriga kiritdi.
“XMT bilan hamkorlikda iqtisodiyotning boshqa tarmoqlarida mehnatga muvofiqlik monitoringi doirasini kengaytirishni rejalashtiryapmiz”, — deydi Nozim Husanov. Idora ma’lumotlariga ko‘ra, gap qurilish sohasi, pillachilik va umumiy ovqatlanish sohasi haqida ketmoqda.
O‘zbekiston hukumati, xalqaro ekspertlar va fuqarolik jamiyati paxtachilik sohasidagi mehnat qoidabuzarliklarini kuzatmoqda. Hisobot ma’lumotlariga ko‘ra, 2020-yili paxta terimi vaqtida majburiy mehnatga jalb etish masalalari bo‘yicha fuqarolarning murojaati 2019-yilga nisbatan 40 foizga qisqargan. Vazirlikning hisoblashicha, bu qayta aloqa mexanizmlari, jamoatchilik xabardorligi va hokimiyat va fuqarolik jamiyati o‘rtasidagi faol muloqotning kuchayishi bilan bog‘liq.
Mehnat vazirligining ma’lum qilishicha, majburiy mehnat uchun ma’muriy javobgarlikni kuchaytirish hamda bolalar va majburiy mehnatdan foydalanganlik uchun jinoiy javobgarlikning kiritilishi amalda ushbu sohada jazo samaradorligini oshirishga imkon bergan. Xususan, 2020-yilda 231 nafar mansabdor majburiy mehnatga jalb qilgani uchun jazolangan bo‘lib, jarimaning umumiy miqdori 20 foizga oshgan — 1,14 milliard so‘m.
Izoh (0)