Ўзбекистон 2021 йилда Халқаро меҳнат ташкилотининг камида яна иккита — «1952 йилги Оналикни муҳофаза қилиш конвенциясини қайта кўриб чиқиш» (№183) ва «Меҳнат хавфсизлиги ва гигиенасига кўмаклашувчи асослар тўғрисида»ги (№187) конвенцияларни ратификация қилишни режалаштирмоқда. Бу ҳақда 7 май куни бандлик ва меҳнат муносабатлари вазири Нозим Ҳусановга таяниб, «Gazeta.uz» хабар берди.
7 май куни Меҳнат вазирлиги биринчи бор «Ўзбекистонда меҳнат ҳуқуқлари ҳимоясини кучайтириш» тўғрисидаги йиллик ҳисоботини эълон қилди. Ўзбекистон айни вақтда Халқаро меҳнат ташкилотининг (ХМТ) 16 та конвенциясини ратификация қилган, жумладан, уларнинг саккизтаси асосий ҳисобланади.
Шунингдек, вазир жорий йилда Ўзбекистон Меҳнат кодексининг янги таҳрирда қабул қилиниши ва 2030 йилгача иш билан таъминлашнинг миллий стратегияси тасдиқланишини ўз идорасининг устувор вазифалари қаторига киритди.
«ХМТ билан ҳамкорликда иқтисодиётнинг бошқа тармоқларида меҳнатга мувофиқлик мониторинги доирасини кенгайтиришни режалаштиряпмиз», — дейди Нозим Ҳусанов. Идора маълумотларига кўра, гап қурилиш соҳаси, пиллачилик ва умумий овқатланиш соҳаси ҳақида кетмоқда.
Ўзбекистон ҳукумати, халқаро экспертлар ва фуқаролик жамияти пахтачилик соҳасидаги меҳнат қоидабузарликларини кузатмоқда. Ҳисобот маълумотларига кўра, 2020 йили пахта терими вақтида мажбурий меҳнатга жалб этиш масалалари бўйича фуқароларнинг мурожаати 2019 йилга нисбатан 40 фоизга қисқарган. Вазирликнинг ҳисоблашича, бу қайта алоқа механизмлари, жамоатчилик хабардорлиги ва ҳокимият ва фуқаролик жамияти ўртасидаги фаол мулоқотнинг кучайиши билан боғлиқ.
Меҳнат вазирлигининг маълум қилишича, мажбурий меҳнат учун маъмурий жавобгарликни кучайтириш ҳамда болалар ва мажбурий меҳнатдан фойдаланганлик учун жиноий жавобгарликнинг киритилиши амалда ушбу соҳада жазо самарадорлигини оширишга имкон берган. Хусусан, 2020 йилда 231 нафар мансабдор мажбурий меҳнатга жалб қилгани учун жазоланган бўлиб, жариманинг умумий миқдори 20 фоизга ошган — 1,14 миллиард сўм.
Изоҳ (0)