Yevropa tiklanish va taraqqiyot banki (YTTB), Yevropa investitsiya banki (YeIB) va Proparco (Agence Française de Développement sho‘ba kompaniyasi) O‘zbekistondagi birinchi Total Eren loyihasini qo‘llab-quvvatlash uchun 87,4 million yevro ajratmoqda. Ushbu mablag‘lar Samarqand yaqinida 100 megavatt quvvatga ega quyosh elektr stansiyasini qurish va ishga tushirish uchun sarflanadi. Bu haqda YTTB matbuot xizmatiga tayanib, “Gazeta.uz” xabar berdi.
Loyiha kompaniyasi Tutly Solar (Total Eren’ga tegishli) tomonidan ajratilayotgan moliyalashtirish to‘plami 43,7 million yevro miqdoridagi YeIB krediti hamda YTTB va Proparco kompaniyalarining taxminan 21,8 million yevro miqdoridagi kreditlaridan iborat.
“Bu mamlakatdagi qayta tiklanadigan energetikaning birinchi xususiy loyihalaridan biridir. Hozirda qazilma yoqilg‘i elektr stansiyalari ustun bo‘lgan O‘zbekistonda energiya balansini diversifikatsiya qilishga yordam beradi”, — deyiladi bayonotda.
Loyiha har yili chiqarilayotgan zararli gazlarning CO2 ekvivalentini 160 ming tonnaga kamaytirishga va qo‘shimcha 270 GVt/soat elektr energiyasini ishlab chiqarishga yordam berishi kutilmoqda.
Ishga tushirilgandan so‘ng Tutly Solar tomonidan ishlab chiqarilgan elektr energiyasi 25 yil muddatdagi elektr energiyasini sotib olish shartnomasi asosida “O‘zbekiston milliy elektr tarmoqlari”ga sotiladi.
Fransiyaning Total Eren kompaniyasi va “O‘zbekenergo” Samarqand viloyatida fotoelektrostansiya qurish bo‘yicha loyihani birgalikda amalga oshirish to‘g‘risida kelishuvga erishgani to‘g‘risida 2018-yilda xabar berilgandi. O‘zbekistonda o‘n yil ichida umumiy quvvati 5 ming megavatt bo‘lgan quyosh elektr stansiyalari qurish rejalashtirilgan.
Izoh (0)