Toshkent viloyati Oqqo‘rg‘on tumani hokimining o‘rinbosari murojaatlarni javobsiz qoldirgani uchun ma’muriy javobgarlikka tortildi. Bu haqda viloyat prokuraturasi axborot xizmati xabar berdi.
Qayd etilishicha, hokim o‘rinbosari “Yoshlar daftari”ga kiritilgan fuqaro M.E.ga yer ajratib berishda amaliy yordam berishni so‘rab yozgan arizasini xizmat xonasida saqlab kelgan. Oradan 77 kun o‘tgan bo‘lsa ham murojaatni ro‘yxatdan o‘tkazish, ko‘rib chiqish va muallifga javob xati yuborish chorasi ko‘rilmagan.
Bundan tashqari, shu kabi qonun buzilishiga 600 nafardan ortiq yoshlarning yer ajratib berish haqidagi murojaatlari bo‘yicha ham yo‘l qo‘yilgan.
Mazkur holat yuzasidan Oqqo‘rg‘on tumani hokimining o‘rinbosariga nisbatan Ma’muriy javobgarlik to‘g‘risidagi kodeksning 43-moddasi (jismoniy va yuridik shaxslarning murojaatlari to‘g‘risidagi qonun hujjatlarini buzish) bilan ma’muriy javobgarlik to‘g‘risida ish qo‘zg‘atilgan.
Bundan avval Qashqadaryo va Andijonda tibbiyot xodimlari va o‘qituvchilarni majburiy mehnatga jalb qilgan mansabdorlar 12,2 mln so‘m jarimaga tortilgani, Andijonda muqaddam sudlangan hokimlik vakili pora bilan qo‘lga tushgani hamda Qashqadaryoda yetarli sharoitlar yaratilmagan mehribonlik uyi direktori ishdan olinib, bir qator mas’ullar javobgarlikka tortilgani haqida xabar berilgandi.
Izoh (0)