Ijtimoiy tarmoqlarda Samarqand shahar Chuqur yo‘li (Kurchatova) ko‘chasi hududidan oqib o‘tuvchi Chashma va Siyobcha kollektorlarining birlashish qismidan binafsha rangdagi, tarkibida ifloslantiruvchi moddalar me’yoridan ortiqcha bo‘lgan oqova suvlar oqayotgani haqida xabar tarqaldi. Ekologiya qo‘mitasi axborot xizmati holat yuzasidan ma’lumot berdi.
Ma’lum qilinishicha, olib borilgan o‘rganish va surishtiruvlar natijasida Samarqand viloyati “Suv ta’minoti” MChJga qarashli SP-3 oqova suv ko‘tarib berish stansiyasi ishlamayotgani sababli shu vaziyat yuzaga kelgan.
Olib borilgan tezkor tadbirlarda baxmal mato ishlab chiqarish faoliyati bilan shug‘ullanadigan “Sayyora tekst” oilaviy korxonasida ishlab chiqarish jarayonida hosil bo‘lgan oqova suvlar belgilangan tartibda tozalanmasdan to‘g‘ridan to‘g‘ri oqava suv tashlash tarmog‘iga tashlanayotgani aniqlandi.
Hozirda mazkur holat to‘liq bartaraf etilib, tegishli hujjatlar rasmiylashtirilmoqda.
Bundan avval Qibraydagi “Qonli ariq” voqeasi yuzasidan berilgan bayonot , Rossiyalik bloger tomonidan videosi e’lon qilingan Qarshi yaqinidagi chiqindixonani tozalash ishlari boshlangani hamda Qo‘qonda chiqindi ko‘p tashlanadigan markaziy ko‘chalarga videokameralar o‘rnatilgani haqida xabar berilgandi.
Izoh (0)