Bolalar ombdusmani Qashqadaryoda joylashgan 5-mehribonlik uyidagi sharoitlarni tanqid qilgani haqida xabar berilgan edi. Bosh prokuratura matbuot xizmati yetarli sharoitlar yaratilmagan ushbu mehribonlik uyi direktori ishdan olinib, bir qator mas’ullar javobgarlikka tortilganini ma’lum qildi.

Foto: Ombudsman matbuot xizmati

Eslatib o‘tamiz, Kitob tumanida joylashgan 5-Mehribonlik uyida 12—15-aprel kunlari Oliy Majlisning Inson huquqlari bo‘yicha vakili (ombudsman) o‘rinbosari va tuman prokuraturasi bilan hamkorlikda o‘tkazilgan o‘rganishda muassasa tarbiyalanuvchilari uchun yetarli sharoitlar yaratilmaganligi, muassasa jihozlari eskirib qolganligi, tarbiyalanuvchilarni sog‘lom ovqatlantirish normalariga amal qilinmayotganligi hamda oziq-ovqat omborxonasi sanitariya talablariga javob bermasligi aniqlangandi.

Bosh prokuratura xabarida aytilishicha, Kitob tumani prokuraturasi tomonidan muassasada o‘tkazilgan tekshirish natijasiga ko‘ra, o‘z xizmat vazifalarini lozim darajada bajarmagan muassasa direktori hamda ombor mudiri egallab turgan lavozimlaridan ozod qilindi, direktor o‘rinbosari intizomiy javobgarlikka tortildi, xo‘jalik mudiri va parhez hamshirasiga nisbatan Ma’muriy javobgarlik to‘g‘risidagi kodeksning 53-moddasi (sanitariya qonun hujjatlarini buzish) bilan ma’muriy javobgarlik to‘g‘risida ish qo‘zg‘atildi.