Buxoro shahridagi maktabgacha ta’lim tashkiloti rahbari 400 dollar pora bilan qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, holat 2021-yilning 6-may kuni Bosh prokuratura huzuridagi departament viloyat boshqarmasi hamda Milliy gvardiya boshqarmasi xodimlari tomonidan o‘tkazilgan tadbirda aniqlangan.Buxoro shahridagi maktabgacha ta’lim tashkiloti direktori 54 yoshli R.S. xizmat mavqeyidan foydalangan holda ikki nafar fuqaroni 0,25 shtat birligida tarbiyachi vazifasiga ishga qabul qilish evaziga ulardan 400 dollar talab qilgan. Bog‘cha mudirasi qizi orqali fuqaro M.R.dan kimyoviy ishlov berilgan pullarni pora tariqasida olgan vaqtida ashyoviy dalillar bilan qo‘lga olingan.
Buxoro shahar maktabgacha ta’lim bo‘limi mudiri Abdurahmon Hamroyevning “Daryo”ga bildirishicha, fuqaro R.S. maktabgacha ta’lim tashkilotiga 2018-yildan beri rahbarlik qilib kelgan.
Mazkur holat yuzasidan R.S.ga nisbatan Jinoyat kodeksining 210-moddasi 2-qismi “v” bandi (pora olish) bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)