Fransiya La-Mansh bo‘g‘ozidagi Jersi orolini elektrsiz qoldirish bilan tahdid qilgandan so‘ng Angliya orolga ikkita patrul kemasini yubormoqda. Bu haqda Britaniya hukumati bosh vaziri Boris Jonson, orol bosh vaziri Jon Le Fondre hamda Jersi tashqi ishlar vaziri Yan Gorst o‘rtasidagi muzokaralar bayonotiga tayanib, “RBK” xabar berdi.
Muzokaralar chog‘ida Jonson Jersi va Fransiya o‘rtasidagi “keskinlikni yumshatish zarurligini” ta’kidlab, orolga “uzluksiz yordam” berishga va’da berdi. U har qanday qamal butunlay asossiz bo‘lishini aytdi.
BBC xabariga ko‘ra, orolga HMS Severn va HMS Tamar kemalari jo‘natiladi. Ularning jo‘natilishi “ehtiyot chorasi” deb atalgan.
Jersi — Normandiya orollari orasida eng kattasi. U Fransiyaning shimoliy qirg‘og‘idan 23 kilometr va Buyuk Britaniya qirg‘og‘idan 140 kilometr janubda joylashgan. Orol Buyuk Britaniya qirollik mulki, ammo Britaniya tarkibiga kirmaydi.
Avvalroq Fransiya baliq ovi bo‘yicha mintaqadagi yangi qoidalar tufayli orolga elektr energiyasini uzib qo‘yishi mumkinligini aytgan edi. Parijning so‘zlariga ko‘ra, orol qirg‘og‘ida baliq ovlash uchun fransuz traulerlariga (baliqchi kema) qo‘yilgan cheklovlar Brexit shartnomalarini buzmoqda.
Jersi hukumati Buyuk Britaniya va Yevropa Ittifoqining Savdo va hamkorlik to‘g‘risidagi bitimiga muvofiq yangi qoidalarni joriy etgan edi. Unga ko‘ra, fransuz kemalarining egalari avval ham ushbu hududda baliq ovi bilan shug‘ullanganini tasdiqlatishi kerak. Shundan keyingina Jersi ma’muriyati ularga litsenziya beradi. Bu safar faqat 41 fransuz trauleriga ruxsatnoma berildi.
Shundan so‘ng Fransiya dengiz vaziri Annik Jirardin Parij bunga javob qaytarishi mumkinligi haqida ogohlantirdi. U orolga Fransiyadan elektr energiyasi olib keladigan dengiz osti kabelini eslatib o‘tdi: “Bundan afsusdaman, lekin kerak bo‘lsa, elektrni uzib qo‘yamiz”.
Reuters S&P Global Platts’ga asoslanib ta’kidlashicha, Jersi elektr energiyasining 95 foizini Fransiyadan oladi.
Izoh (0)