Франция Ла-Манш бўғозидаги Жерси оролини электрсиз қолдириш билан таҳдид қилгандан сўнг Англия оролга иккита патруль кемасини юбормоқда. Бу ҳақда Британия ҳукумати бош вазири Борис Жонсон, орол бош вазири Жон Ле Фондре ҳамда Жерси ташқи ишлар вазири Ян Горст ўртасидаги музокаралар баёнотига таяниб, «РБК» хабар берди.
Музокаралар чоғида Жонсон Жерси ва Франция ўртасидаги «кескинликни юмшатиш зарурлигини» таъкидлаб, оролга «узлуксиз ёрдам» беришга ваъда берди. У ҳар қандай қамал бутунлай асоссиз бўлишини айтди.
BBC хабарига кўра, оролга HMS Severn ва HMS Tamar кемалари жўнатилади. Уларнинг жўнатилиши «эҳтиёт чораси» деб аталган.
Жерси — Нормандия ороллари орасида энг каттаси. У Франциянинг шимолий қирғоғидан 23 километр ва Буюк Британия қирғоғидан 140 километр жанубда жойлашган. Орол Буюк Британия қироллик мулки, аммо Британия таркибига кирмайди.
Аввалроқ Франция балиқ ови бўйича минтақадаги янги қоидалар туфайли оролга электр энергиясини узиб қўйиши мумкинлигини айтган эди. Парижнинг сўзларига кўра, орол қирғоғида балиқ овлаш учун француз траулерларига (балиқчи кема) қўйилган чекловлар Brexit шартномаларини бузмоқда.
Жерси ҳукумати Буюк Британия ва Европа Иттифоқининг Савдо ва ҳамкорлик тўғрисидаги битимига мувофиқ янги қоидаларни жорий этган эди. Унга кўра, француз кемаларининг эгалари аввал ҳам ушбу ҳудудда балиқ ови билан шуғулланганини тасдиқлатиши керак. Шундан кейингина Жерси маъмурияти уларга лицензия беради. Бу сафар фақат 41 француз траулерига рухсатнома берилди.
Шундан сўнг Франция денгиз вазири Анник Жирардин Париж бунга жавоб қайтариши мумкинлиги ҳақида огоҳлантирди. У оролга Франциядан электр энергияси олиб келадиган денгиз ости кабелини эслатиб ўтди: «Бундан афсусдаман, лекин керак бўлса, электрни узиб қўямиз».
Reuters S&P Global Platts’га асосланиб таъкидлашича, Жерси электр энергиясининг 95 фоизини Франциядан олади.
Изоҳ (0)