Turkmanistonda ikki yildan buyon urush qatnashchilari va frontorti faxriylaridan G‘alaba kuni sharafiga beriladigan sovg‘alar uchun pul yig‘ib olinmoqda. Bu haqda Tengrinews xabar berdi.
Ma’lum bo’lishicha, Lebap viloyatining Farap etrapida urush va frontorti faxriylaridan pul yig‘ilgan. Faxriylarning mahalliy ma’muriyatga murojaat qilgan qarindoshlarining so‘zlariga ko‘ra, hukumat pul yig‘ilishi to‘g‘risida rasmiy tushuntirish bermayapti.
“O‘tgan yili Lebap faxriylari 1000 manat (3 mln so‘m) to‘lashga va kerakli ijtimoiy himoya qog‘ozlarini o‘zlari rasmiylashitirga majbur bo‘ldi. 2020-yilda G‘alabaning 75 yilligi sharafiga faxriylarga yubiley medali topshirildi. Medal uchun ham o‘nlab mahalliy faxriylardan pul yig‘ildi”, — deb yozadi agentlik.
Noma’lum manbalarga ko‘ra, faxriylarga topshiriladigan sovg‘alar yig‘ilgan mablag‘larni oqlamaydi, chunki hukumat pullarning yarmini boshqa ehtiyojlar uchun ushlab qoladi.
Shu bilan birga, mahalliy hokimiyat organlari sovg‘aning qiymati shakllanishiga qarab, prezident farmoniga tayyorgarlik ko‘radi. Agar zarur bo‘lsa, ayollar kengashi a’zolari, kasaba uyushmalari va harbiy xizmatchilardan qo‘shimcha mablag‘ yig‘ib olinadi.
Turkmanistonda Ikkinchi Jahon urushi faxriylariga beriladigan pul va qimmatbaho sovg‘alar miqdoriga aniqlik kiritilmagan. Avvalgi yillarda ularga 9-may kuni 200 manatdan (600 ming so‘m) to‘langan.
Qayd etilishicha, Turkmanistondagi faxriylarning maqomi aholini ijtimoiy himoya qilish to‘g‘risidagi kodeksda qonun bilan mustahkamlangan. Mamlakatdagi faxriylar soni to‘g‘risida ma’lumot hozircha mavjud emas.
ASIA-Plus xabariga ko‘ra, Tojikistonda G‘alaba kunining 76 yilligi munosabati bilan Ikkinchi Jahon urushi qatnashchilarining har biriga davlat rahbarining zaxira fondidan 10 ming somoniy (9,2 mln so‘m) miqdorida bir martalik moddiy yordam ajratildi.
Bundan tashqari, prezident Tojikistonning barcha tuman, shahar va viloyatlari rahbarlariga Ikkinchi Jahon urushi qatnashchilariga mahalliy budjetlar hisobidan moddiy yordam ko‘rsatishni topshirdi.
Tojikiston Sog‘liqni saqlash vazirligining ma’lumotlariga ko‘ra, hozirgi paytda mamlakatda 94 nafar urush faxriysi yashaydi. Bir oy oldin ularning soni 102 tani tashkil etgan bo‘lsa, 2020-yili 168 nafar faxriy G‘alaba kunini nishonlagan edi.
Ikkinchi jahon urushi frontlarida 300 mingga yaqin Tojikiston aholisi jang qilgan, shulardan 92 ming kishi halok bo‘lgan va bedarak yo‘qolgan.
65 nafari Sovet Ittifoqi Qahramoni unvoni, 15 nafari uch darajali “Shon-sharaf” ordeni bilan mukofotlangan, jami 55 ming kishi orden va medallarga sazovor bo‘lgan.
Avvalroq, Dushanbe hokimi Rustam Emomali poytaxtda yashovchi 16 nafar Ikkinchi Jahon urushi faxriylariga bir yarim ming somoniydan (1,3 mln so‘m) topshirish haqida buyuruq bergan edi.
Eslatib o‘tamiz, Rossiyada Ikkinchi jahon urushi faxriylariga beriladigan mukofot puli O‘zbekiston va Qozog‘istondagiga nisbatan bir necha baravar kam ekani ma’lum bo‘ldi. Rossiyada faxriylarga 9-may kuni 10 ming rubldan (1,4 mln so‘m) mukofot puli beriladi. O‘zbekistonda bu pul 12 million so‘mni tashkil etadi (deyarli 86 ming rubl), Qozog‘istonda hokimiyat faxriylarga million tenge (175 ming rubl — 24,4 mln so‘m) yuboradi.
Izoh (0)