Toshkent viloyatida ichki ishlar xodimining formasida raqsga tushganini videoga olib, uni internetda tarqatgan 21 yoshli yigit jazoga tortildi, deb xabar beradi IIV matbuot xizmati.
Ma’lum qilinishicha, sartarosh bo‘lib ishlovchi 21 yoshli A. 2-may kuni “Yangiobod” bozoriga gitara sotib olish uchun borgan. U yerda ichki ishlar xodimlarining xizmat formasi sotilayotganini ko‘rgan va uni xarid qilgan.
Ishxonaga qaytib kelgan yigit, formani kiygan holda turli qiliqlar qilib, o‘zini videoga olgan va uni do‘stlariga yuborgan. Holat bo‘yicha o‘tkazilgan surishtiruv davomida IIO xodimi yigitdan vaziyatga oydinlik kiritishni so‘raganida, u xodimga qarshilik ko‘rsatgan.
Jinoyat ishlari bo‘yicha Toshkent viloyati Yuqori Chirchiq tuman sudi tomonidan A.ga nisbatan 7 sutka ma’muriy qamoq jazosi tayinlandi.
Avvalroq Toshkentda ichki ishlar xodimi kiyimini kiyib, mashina kapoti ustida videoga tushgan yigit va uning sherigi 5 sutkaga, Sirdaryoda esa ichki ishlar xodimi kiyimida raqsga tushgan yigit 8 sutkaga qamalgani to‘g‘risida xabar berildi.
Izoh (0)