Фарғонада босқинчиликда айбланаётган 4 фуқаро суд биносидан қочиб кетди
Жиноят ишлари бўйича Тошлоқ туман судида босқинчилик жиноятида айбланган тўрт киши суд биносидан қочиб кетди, деб хабар беради «Xabar.uz».
Нашр манбасининг маълум қилишича, судланувчиларнинг барчасига дастлабки терговдаёқ қамоққа олиш эҳтиёт чораси қўлланган бўлиб, улар ички ишлар органи ходимларининг кузатуви ва назоратида суд мажлисига олиб келинган. Шунга қарамай, оғир жиноятда айбланаётган фуқаролар бинонинг ертўла қисмидаги орқа девордан ошиб қочиб кетган.
«Айбланаётганларнинг икки нафари ака-ука экани айтилмоқда. Яна икки нафари муқаддам бир неча марта судланган шахслар экани аниқ», — дейилади хабарда.
«Халқ сўзи online»нинг Фарғона вилоят судининг Жамоатчилик ва оммавий ахборот воситалари билан алоқалар бўлими бошлиғи Қобилжон Муталиевга таяниб ёзишича, тезкор чора-тадбирлар натижасида судланувчилар шу куннинг ўзидаёқ вилоят ҳудудида ушланган.
Эслатиб ўтамиз, 2020 йилнинг октябрида Нурафшонда вояга етмаган болани зўрлашда айбланаётган фуқаро суд биносидан қочиб кетганди. Орадан бир кун ўтгач гумонланувчи ҳуқуқ-тартибот органлари ходимлари томонидан олиб борилган тезкор қидирув суриштирув ишлари давомида қўлга олинган эди.
