Turkmanistonda oziq-ovqat do‘konlarida navbatga turish taqiqlandi

Turkmanistonning mahsulotlarni imtiyozli narxlarda sotuvchi davlat do‘konlarida navbat hosil qilish taqiqlandi, chunki bu prezidentning “imijiga salbiy ta’sir qiladi”, deb yozmoqda “Korrespondent.net”.

Ushbu taqiq Turkmaniston prezidentining o‘g‘li, bosh vazir o‘rinbosari Serdar Berdimuhamedovning buyrug‘i bilan joriy etildi. Avvalroq u savdo vaziridan do‘kon atrofida yoki yonida ko‘p odam to‘planmasligini talab qilgan edi.

Endi fuqarolar do‘konlarda ro‘yxatdan o‘tishi va do‘kon ma’muriyatining qo‘ng‘irog‘ini kutishi kerak, shundan keyingina mijozlar do‘konlarga borib, mahsulotlarni imtiyozli narxlarda sotib olishi mumkin. Xususan, mamlakat poytaxtida to‘rt kishigacha navbatda turishga ruxsat berildi, qolganlar o‘z navbatini eng yaqin yo‘laklarda kutishi belgilandi.

“Politsiya xodimlari do‘konlar yonida 4 kishidan ortiq navbat bo‘lishiga ruxsat bermayapti. Mahsulotlar do‘konning asosiy kirish joyidan emas, orqa eshigidan ham sotilyapti. Kimdir norozilik bildirmoqchi bo‘lsa, politsiya uni hibsga olib, jazo tariqasida navbatdan chetlatish bilan tahdid qilyapti”, — dedi shahar fuqarolaridan biri.

Ma’lumotlarga ko‘ra, Turkmanistonda ketma-ket to‘rtinchi yil oziq-ovqat mahsulotlari inqirozi kuzatilmoqda. Xususiy do‘konlar va bozorlardagi narxlarning ko‘tarilgani sababli oziq-ovqat mahsulotlarini imtiyozli narxlarda sotib olish uchun mamlakat aholisi erta tongdan navbatda turishga majbur bo‘lmoqda.

O‘z navbatida Turkmaniston hukumati oziq-ovqat inqirozi va ijtimoiy-iqtisodiy muammolarning mavjudligini tan olmayapti.

Ma’lumot uchun, avvalroq Turkmaniston prezidenti uning so‘zlarini yozib olish bo‘yicha tanlov tashkil qilgan edi. Stadionda Gurbanguli Berdimuhamedov ishtirokida sport kiyimidagi odamlarning prezident so‘zlarini daftarga tushirayotgani tasvirlangan video tarmoqqa joylandi.

Shuningdek, mamlakatda alabay kuchugiga tilladan yodgorlik o‘rnatildi. Ochilish marosimida televideniye orqali alabay zotli itlar ishtirokidagi videolavhalar namoyish etildi.

Avvalroq Turkmaniston prezidenti ikkinchi sun’iy yo‘ldoshni uchirishni va yuk samolyotlarini sotib olishni buyurgani, sanoat sektori ishini tanqid qilib, “Turkmanximiya” rahbariga qattiq tanbeh bergani hamda olimlarga kartoshka hosildorligini oshirishni buyurgani haqida xabar berilgandi.