Туркманистонда озиқ-овқат дўконларида навбатга туриш тақиқланди

Туркманистоннинг маҳсулотларни имтиёзли нархларда сотувчи давлат дўконларида навбат ҳосил қилиш тақиқланди, чунки бу президентнинг «имижига салбий таъсир қилади», деб ёзмоқда «Korrespondent.net».

Ушбу тақиқ Туркманистон президентининг ўғли, бош вазир ўринбосари Сердар Бердимуҳамедовнинг буйруғи билан жорий этилди. Аввалроқ у савдо вазиридан дўкон атрофида ёки ёнида кўп одам тўпланмаслигини талаб қилган эди.

Энди фуқаролар дўконларда рўйхатдан ўтиши ва дўкон маъмуриятининг қўнғироғини кутиши керак, шундан кейингина мижозлар дўконларга бориб, маҳсулотларни имтиёзли нархларда сотиб олиши мумкин. Хусусан, мамлакат пойтахтида тўрт кишигача навбатда туришга рухсат берилди, қолганлар ўз навбатини энг яқин йўлакларда кутиши белгиланди.

«Полиция ходимлари дўконлар ёнида 4 кишидан ортиқ навбат бўлишига рухсат бермаяпти. Маҳсулотлар дўконнинг асосий кириш жойидан эмас, орқа эшигидан ҳам сотиляпти. Кимдир норозилик билдирмоқчи бўлса, полиция уни ҳибсга олиб, жазо тариқасида навбатдан четлатиш билан таҳдид қиляпти», — деди шаҳар фуқароларидан бири.

Маълумотларга кўра, Туркманистонда кетма-кет тўртинчи йил озиқ-овқат маҳсулотлари инқирози кузатилмоқда. Хусусий дўконлар ва бозорлардаги нархларнинг кўтарилгани сабабли озиқ-овқат маҳсулотларини имтиёзли нархларда сотиб олиш учун мамлакат аҳолиси эрта тонгдан навбатда туришга мажбур бўлмоқда.

Ўз навбатида Туркманистон ҳукумати озиқ-овқат инқирози ва ижтимоий-иқтисодий муаммоларнинг мавжудлигини тан олмаяпти.

Маълумот учун, аввалроқ Туркманистон президенти унинг сўзларини ёзиб олиш бўйича танлов ташкил қилган эди. Стадионда Гурбангули Бердимуҳамедов иштирокида спорт кийимидаги одамларнинг президент сўзларини дафтарга тушираётгани тасвирланган видео тармоққа жойланди.

Шунингдек, мамлакатда алабай кучугига тилладан ёдгорлик ўрнатилди. Очилиш маросимида телевидение орқали алабай зотли итлар иштирокидаги видеолавҳалар намойиш этилди.

Аввалроқ Туркманистон президенти иккинчи сунъий йўлдошни учиришни ва юк самолётларини сотиб олишни буюргани, саноат сектори ишини танқид қилиб, «Туркманхимия» раҳбарига қаттиқ танбеҳ бергани ҳамда олимларга картошка ҳосилдорлигини оширишни буюргани ҳақида хабар берилганди.