Jons Hopkins universiteti ma’lumotlariga ko‘ra, dunyoda koronavirusga chalinganlar soni 149 647 719 kishiga yetdi. Kasallanganlar soni bo‘yicha AQSh (32,2 million), Hindiston (18,3 million), Braziliya (14,5 million), Fransiya (5,6 million) va Turkiya (4,7 million) yetakchilik qilmoqda. Shuningdek, COVID-19 oqibatidagi o‘limlar soni 3 151 397 tani tashkil qilmoqda.
Jahon sog‘liqni saqlash tashkilotining Panamerika mintaqaviy bo‘linmasi rahbari Karissa Etyen ma’lum qilishicha, koronavirus pandemiyasi hali yakunlangani yo‘q. Aksincha, COVID-19 tarqalish sur’atlarining oshishi qayd etilmoqda.
“Bizning mintaqamiz hamon bu pandemiya qamrovida qolmoqda… Janubiy Amerikaning bir nechta mamlakatlarida shu yilning ilk to‘rt oyidagi vaziyat 2020-yildagiga nisbatan yanada yomonroq bo‘ldi. Bu shuni ko‘rsatadiki, biz bu pandemiyani faqat vaksinalardan tezkor va adolatli tarzda foydalanish hamda samarali profilaktika choralarini birgalikda qo‘llasakkina yengib o‘tishimiz mumkin. Bu pandemiya hali tugash u yoqda tursin, tezlashyapti”, — dedi Etyen.
Koronavirus bilan kasallanganlar yoki unga qarshi vaksina olganlar, taxminan, har yarim yilda antitanalar darajasini tekshirtirib turishi kerak, dedi infeksionist-shifokor, tibbiyot fanlari doktori Nikolay Malishev.“Shuni esda tutish kerakki, antitanalar abadiy emas. 5—6 oydan keyin immunitet tushib ketishi haqida qachonlardan buyon aytiladi. Haqiqatan ham, kasallikdan keyin yarim yil o‘tib, antitanalar miqdorini tekshirib ko‘rish va bir necha oyda bir marta bu tahlilni qaytarib turish mumkin”, — dedi Malishev.
Uning so‘zlariga ko‘ra, buni bitta laboratoriyaning o‘zida amalga oshirish kerak, chunki turli laboratoriyalarda test tizimlari turlicha bo‘lib, ko‘rsatkichlar ham turlicha chiqadi.
Ispaniya hukumati iyundan, koronavirusga qarshi emlanganlik to‘g‘risidagi umumyevropa raqamli sertifikati joriy qilinganidan keyin, xorijlik sayohatchilar uchun mamlakatni ochib qo‘yishni rejalashtirmoqda. Bu haqda Ispaniya turizm vaziri Fernando Valdes ma’lum qildi.Uning so‘zlariga ko‘ra, dastlab sayyohlar may oyidayoq “sinov rejimi”da kiritila boshlaydi va shu tariqa iyundagi vaziyat prognoz qilinadi.
“Ispaniya iyunda butun dunyodagi sayohatchilarga tashrif uchun ochilganini xabar qilishga tayyor bo‘ladi”, — dedi Valdes.
Uning qo‘shimcha qilishicha, Yevroittifoqqa kirmaydigan mamlakatlardan keladigan sayyohlarning har qanday kiritilish sxemasi Yevroittifoq raqamli yashil sertifikatiga bog‘liq bo‘ladi.
Ispaniyaga kirish uchun sayyoh Yevroittifoqda ruxsat berilgan vaksinalarning ikkita dozasini olgani to‘g‘risidagi ma’lumotnomani yoki koronavirus bilan kasallanib o‘tgani haqidagi ma’lumotnomani yoki bo‘lmasa, COVID-19’ga nisbatan manfiy testni ko‘rsatishi kerak.
Turkiya Rossiyadan koronavirusga qarshi “Sputnik V” vaksinasini 50 million dozada sotib olish to‘g‘risidagi shartnomani imzoladi, deya ma’lum qildi mamlakat sog‘liqni saqlash vaziri Faxriddin Ko‘ja. U shartnoma qiymatini oshkor qilmadi.Ko‘janing ma’lum qilishicha, hozir vaksina favqulodda vaziyatlarda foydalanishga ruxsat olish uchun sinovdan o‘tkazish jarayonining so‘nggi bosqichida turibdi. “Sputnik V”ning ilk partiyalarini may oyida olib kelish kutilmoqda. 50 million doza vaksina Turkiyaga olti oy mobaynida yetkaziladi.
Avvalroq, 26-aprel kuni Rossiya to‘g‘ridan to‘g‘ri investitsiyalar fondi Turkiyaning Viscoran Ilac farmatsevtika kompaniyasi bilan “Sputnik V”ni Turkiyada ishlab chiqarish haqida kelishib olgan edi. Vaksinani ishlab chiqarish bir nechta korxonalarda “yaqin oylar ichida” boshlanishi mumkin.
Izoh (0)