Rossiya prezidenti Vladimir Putin va AQSh prezidenti Jo Baydenning uchrashuvi yoz faslida bo‘lib o‘tadi. Bu haqda Rossiya prezidenti matbuot kotibi Dmitriy Peskovga tayanib, “Korrespondent.net” xabar berdi.
“Haqiqatan ham ma’lum takliflar bildirildi, uchrashuvning aniq sanasini hali tasdiqlay olmayman. Hozircha sanalar bo‘yicha kelishuv mavjud emas. Lekin gap yoz oylari haqida ketmoqda. Yakuniy kelishuvga erishish uchun yana ko‘plab turli xil omillarni tahlil qilish kerak”, — deya Peskov va uchrashuv qaysi mamlakatda o‘tkazilishi ham noaniq ekanini qo‘shimcha qildi.
Shuningdek, Peskov prezidentlarning uchrashuvi Baydenning iyun oyida bo‘lib o‘tadigan NATO sammiti munosabati bilan Yevropaga safari chog‘ida o‘tkazilishi ehtimoli haqida izoh bermadi.
13-aprel kuni telefon orqali suhbatda Bayden Putinga neytral hudud sifatida “uchinchi mamlakatda” uchrashishni taklif qildi. Oq uy uchrashuv yozda bo‘lib o‘tishi mumkin, deb taxmin qildi, ammo Kreml ma’lum bir joy va vaqt haqida gapirish hali ertaligini aytdi.
Avvalroq Baydenning prezident sifatida ilk xorijiy safari iyun oyida Buyuk Britaniya va Belgiyaga uyushtirilishi haqida xabar berilgandi. Xabarga ko‘ra, Bayden 11—13-iyun kunlari Britaniyaning Kornuoll grafligida bo‘lib o‘tadigan G7 davlatlar sammitida ishtirok etadi. Shundan so‘ng Bayden 14-iyun kuni bo‘lib o‘tadigan NATO sammitida ishtirok etish uchun Belgiyaga yo‘l oladi.
Mavzuga doir:
Izoh (0)