AQSh prezidenti Jo Bayden Rossiya davlat rahbari Vladimir Putin bilan telefon orqali muloqot qildi. Bu haqda Oq uy ma’lum qilgan, deb yozmoqda “Interfaks”.

Foto: Getty Images

Prezidentlar strategik barqarorlik, global va mintaqaviy mavzularni muhokama qilgan.

“Ular ko‘plab mintaqaviy va global muammolar, jumladan, AQSh hamda Rossiyaning strategik barqarorlikni davom ettirish shartlarini muhokama qildi”, — deyiladi Oq uy bayonotida.

Oq uy muloqotning qurollanish nazorati masalalari, shuningdek, xavfsizlik sohasidagi muammolarga taalluqli ekanini bildirgan.

Ikki prezidentning telefondagi suhbati Bayden ABC News jurnalistining “Putinni qotil deb hisoblash mumkinmi?” qabilida bergan savoliga “Ha” deb javob berganidan keyin birinchi muloqot bo‘ldi. O‘shanda AQSh davlat rahbarining mazkur harakatiga Kreml va Rossiya Davlat dumasi tomonidan keskin javob qaytarilgan.

Uchinchi tomonda sammit o‘tkazish taklifi

AQSh prezidenti rossiyalik hamkasbiga yaqin oylar ichida uchinchi bir mamlakatda sammit o‘tkazishni taklif qildi.

“Prezident Bayden Rossiya bilan barqaror va AQSh manfaatlariga har tomonlama mos keladigan munosabatlar o‘rnatish istagini bildirdi. U yaqin oylar ichida uchinchi bir mamlakatda AQSh hamda Rossiya duch kelayotgan masalalarni muhokama qilib olishni taklif etdi”, — deyiladi Oq uy axborotida.

Ukraina mavzusi

Bayden telefondagi so‘zlashuv vaqtida Ukraina bilan chegara hududlarda Rossiya Qurolli Kuchlarining joylashtirilganidan xavotirda ekanini qayd etgan va Moskvadan Kiyev bilan keskin munosabatlarni kamaytirishni so‘ragan.

“Prezident AQSh Rossiyaning Qrim va Ukraina chegarasida qo‘shinlari sonini oshirayotganidan xavotirda ekanini aytdi va Putindan mazkur hududlardagi keskinlikni kamaytirishni so‘radi”, — deyilgan bayonotda.

“Prezident Bayden AQSh Ukrainaning suvereniteti va hududiy yaxlitligini ishonch bilan qo‘llab-quvvatlashi haqida gapirgan”, — deyiladi hujjatda.

Xakerlar va saylovlarga aralashuv

Shuningdek, telefondagi suhbatda Rossiyaning AQShdagi saylovlarga aralashuvi hamda xakerlik hujumlari ham muhokama qilingan.

“Prezident Bayden AQShning milliy manfaatlarini himoya qilish yo‘lida Rossiyaga kiberhujumlar va saylovlarga aralashuv uchun javob qaytarishga tayyor ekanini ma’lum qildi”, — deyilgan bayonot so‘ngida.

Avval AQShning garchi Rossiya elchisini chaqirib olganiga qaramay, Moskvadagi elchisini o‘zgartirmaslikka qaror qilgani haqida xabar berilgandi.