Rossiya Italiya elchixonasining mudofaa va harbiy masalalar bo‘yicha harbiy attashesi yordamchisini persona non grata deb e’lon qildi va unga 24 soat ichida mamlakatdan chiqib ketishni buyurdi. Bu haqda Rossiya Tashqi ishlar vazirligiga tayanib, “Interfaks” xabar berdi.
Xabarga ko‘ra, 26-aprel kuni Italiyaning Moskvadagi elchisi Paskuale Terrachchano Rossiya Tashqi ishlar vazirligiga chaqirildi va unga elchixona xodimini “Italiya hukumatining Rimdagi Rossiya elchixonasi harbiy attashesiga qarshi dushmanlik va asossiz harakatlariga javob” sifatida chiqarib yuborish to‘g‘risida nota topshirildi.
31-mart kuni Italiya karabinerlari tomonidan Rimda o‘tkazilgan maxsus operatsiya davomida Rossiya foydasiga josuslikda gumon qilingan ikki kishi hibsga olingan edi. Keyinroq Italiya Tashqi ishlar vazirligi josuslik ishiga aloqadorligi taxmin qilingan Rossiya elchixonasining ikki xodimi mamlakatdan chiqarib yuborilishi haqida e’lon qildi.
“Biz ushbu o‘ta jiddiy ishga aloqador ikki rossiyalik amaldorning zudlik bilan mamlakatdan chiqarib yuborilishi to‘g‘risida ma’lum qilamiz”, — deb yozgan vazir Facebook’dagi sahifasida.
Avvalroq Bolgariyada ikki nafar rossiyalik diplomat josuslikda gumon qilinib, Rossiyaga qaytarib yuborilgan edi. Shuningdek, Shvetsiya fuqarosi Rossiya foydasiga josuslikda ayblanib, hibsga olingan.
Shuningdek, AQSh kiritgan yangi sanksiyalar fonida Rossiya o‘n nafar amerikalik diplomatni AQShga qaytarib yuborishini ma’lum qilgan. Diplomatlar 21-mayga qadar Rossiya hududidan chiqib ketishi shart.
Rossiyaning tashqi siyosatida Polsha, Bolgariya hamda Chexiya bilan munosabatlarda ham keskinlik kuzatilmoqda. Chexiya 18 nafar rossiyalik diplomatni qaytarib yuborishini bildirganidan keyin Rossiya ham 20 nafar chexiyalik diplomatni Moskvadan chiqarib yuborgan.
Izoh (0)