Spotify musiqiy striming servisi Car Thing nomli avtomobil pleyerini taqdim etdi — u servisdagi musiqalar va podkastlarni eshitishga mo‘lallangan. Qurilmaning ko‘rinishi GPS-navigatorga o‘xshaydi: ventilyatsiya deflektori yoki old oynaga qotirish mumkin bo‘lgan plastik korpusdagi kichik ekran. Spotify pleyerlarning birinchi partiyasini AQShda bepul tarqatadi, biroq aksiyada ishtirok etish uchun bir qator shartlarni bajarish zarur, deb yozadi Motor.
Bepul devaysni faqatgina Spotify Premium’ga pulli obuna bo‘lib, maxsus sayt orqali ro‘yxatdan o‘tgan va qurilmani testdan o‘tkazishda ishtirok etishga tasdiqlangan foydalanuvchilar qo‘lga kiritishi mumkin. Ammo ular pleyerni yetkazib berilishi uchun baribir pul to‘lashi kerak. Keyinchalik kompaniya Car Thing qurilmalarini 80 dollardan sotish niyatida, biroq hozircha uning qachon savdoga chiqishi noma’lum.
Car Thing’ni navigatsiya tugmachasi va klavishlar orqali yoki ovoz yordamida boshqarish mumkin: bunda “Salom, Spotify” deyish va ma’lum bir qo‘shiq, albom, ijroji yoki podkastni qo‘yishini so‘rash kifoya. Qurilma avtomobilga Bluetooth, USB-kabel yoki 3,5 millimetrli razyom yordamida ulanadi.
Spotifiy Car Thing pleyerini 2019-yildan buyon sinovdan o‘tkazib kelmoqda. Kompaniyadagilarning ta’kidlashicha, Spotify stiriming platformaligicha qoladi va turli musiqiy gadjetlarni ishlab chiqarish imkoniyatini ko‘rib chiqmayapti.
Eslatib o‘tamiz, fevral oxirlarida Spotify musiqiy striming servisi O‘zbekistonda ishga tushgandi. Obunani (9,99 dollar + soliq) kompaniya sayti orqali ham xarid qilsa bo‘ladi (xalqaro karta kerak). Va’da qilinganidek, Spotify O‘zbekistonga to‘liq global katalogini taqdim etgan.
Izoh (0)