Toshkentda 33 yoshli N.M. boshqaruvidagi Nexia va 30 yoshli A.A. boshqaruvidagi “RS200S” mototsikli to‘qnashdi, deb xabar bermoqda poytaxt IIBB matbuot xizmati.
Voqea 14-aprel kuni, taxminan, soat 08:20 da Mirzo Ulug‘bek tumani, Ziyolilar ko‘chasidagi “Uzavtotrans” binosi qarshisida yuz bergan. To‘qnashuv oqibatida mototsiklchi olgan tan jarohatlaridan voqea joyida halok bo‘lgan.
Dastlabki ma’lumotlarga ko‘ra, to‘qnashuvga yengil avtomobil haydovchisi qayta burilish vaqtida harakat ustuvorligiga ega bo‘lgan transportni mensimagani sabab bo‘lgan.
Holat yuzasidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘lishiga sabab bo‘lishi) bo‘yicha jinoiy ish qo‘zg‘atilib, tergov olib borilmoqda.
Avvalroq Navoiyda Nexia urib yuborgan velosiped haydovchisi shifoxonada vafot etgani, Farg‘onada Lacetti yo‘lni kesib o‘tayotgan 12 yoshli velosipedchini urib ketgani haqida xabar berilgan edi.
Izoh (0)