Norvegiyada mart oyida sotilgan barcha avtomobillarning 85 foizini elektrokarlar va gibrid avtomobillar tashkil qildi. Shuningdek, ichki yonish dvigatelli avtomobillarnining savdosi 9,5 foizga kamaydi. Bu haqda Thenextweb xabar berdi.
Elektromobillar tushunchasi ko‘pincha ikki turni o‘z ichiga oladi. Birinchisi — BEV (Battery Electric Vehicle) — bu to‘liq batareya yordamida harakatlanadigan elektromobil, ikkinchisi — PHEV (Plug-in Hybrid Electric Vehicles) — ichki yonish dvigateli va elektrodvigatel bilan jihozlangan gibrid transport vositasi bo‘lib, uning batareyasini nafaqat harakatlanayotgan mashina dvigatelidan, balki tashqi energiya manbalaridan (zaryadlash stantsiyasi yoki rozetkadan) ham quvvatlantirish mumkin.
Mart oyining savdo ma’lumotlariga ko‘ra, Norvegiyada sotilgan avtomobillarning 85 foizini BEV va PHEV tashkil qildi. Bu ko‘rsatkich 2020-yilning mart oyiga taqqoslaganda 10 foizga ko‘proq. Savdoning 56,3 foizi to‘liq batareya bilan ishlaydigan avtomobillarga, 28,6 foizi esa gibrid avtomobillarga to‘g‘ri keladi.
2020-yilda Norvegiya elektromobillar savdosi boshqa turdagi avtomobillarnikidan oshib ketgan birinchi davlat bo‘lgan edi. Norvegiya yo‘l federatsiyasining (OFV) hisobotiga ko‘ra, 2020-yilda mamlakatda sotib olingan barcha yangi avtomobillar orasida BEV’larning ulushi 54,3 foizni tashkil etgan.
Ma’lumot uchun, 2019-yilda elektromobillar ulushi 42,4 foiz bo‘lgan bo‘lsa, 10 yil avval bu ko‘rsatkich 1 foizni tashkil etar edi. 2025-yilgacha mamlakatda elektromobillardan boshqa barcha avtomobillar savdosining to‘xtatilishi rejalashtirilgan.
Bloomberg’ning bashorat qilishicha, kelgusi yillarda litium-ionli batareyalar narxi pasayishi natijasida 2023-yilga kelib elektromobillarning narxi benzin va dizel yoqilg‘isi bilan harakatlanuvchi avtomobillar narxlari bilan tenglashadi.
Avvalroq Latviyaning to‘liq uzatmali zirhlangan avtomobillarni ishlab chiqaruvchi Dartz kompaniyasi Nikrob kompaniyasi bilan birlashib, “Yevropadagi eng arzon avtomobil” deya e’tirof etilayotgan Freze Nikrob modelini taqdim etdi. Mashinaning boshlang‘ich narxi 10 ming yevroni tashkil etadi.
Shuningdek, Xitoyda navbatdagi hamyonbop elektromobil sotuvga chiqdi. Uch eshikli Pocco Meimei modeli interyeri va eksteryeridagi o‘ziga xos dizayn, qo‘shimcha uskunalar to‘plami, shuningdek, arzonligi bilan ko‘pchilikni hayron qoldirdi: bazaviy elektrokar narxi 4600 AQSh dollarini tashkil etadi.
Izoh (0)