Норвегияда бензинли автомобиллар деярли сотилмаяпти. Март ойида сотилган машиналарнинг 85 фоизи электрокар ва гибридлардир

Норвегияда март ойида сотилган барча автомобилларнинг 85 фоизини электрокарлар ва гибрид автомобиллар ташкил қилди. Шунингдек, ички ёниш двигателли автомобилларнининг савдоси 9,5 фоизга камайди. Бу ҳақда Thenextweb хабар берди.

Электромобиллар тушунчаси кўпинча икки турни ўз ичига олади. Биринчиси — BEV (Battery Electric Vehicle) — бу тўлиқ батарея ёрдамида ҳаракатланадиган электромобил, иккинчиси — PHEB (Plug-in Hybrid Electric Vehicles) — ички ёниш двигатели ва электродвигатель билан жиҳозланган гибрид транспорт воситаси бўлиб, унинг батареясини нафақат ҳаракатланаётган машина двигателидан, балки ташқи энергия манбаларидан (зарядлаш станцияси ёки розеткадан) ҳам қувватлантириш мумкин.

Март ойининг савдо маълумотларига кўра, Норвегияда сотилган автомобилларнинг 85 фоизини BEV ва PHEB ташкил қилди. Бу кўрсаткич 2020 йилнинг март ойига таққослаганда 10 фоизга кўпроқ. Савдонинг 56,3 фоизи тўлиқ батарея билан ишлайдиган автомобилларга, 28,6 фоизи эса гибрид автомобилларга тўғри келади.

2020 йилда Норвегия электромобиллар савдоси бошқа турдаги автомобилларникидан ошиб кетган биринчи давлат бўлган эди. Норвегия йўл федерациясининг (OFV) ҳисоботига кўра, 2020 йилда мамлакатда сотиб олинган барча янги автомобиллар орасида BEV’ларнинг улуши 54,3 фоизни ташкил этган.

Маълумот учун, 2019 йилда электромобиллар улуши 42,4 фоиз бўлган бўлса, 10 йил аввал бу кўрсаткич 1 фоизни ташкил этар эди. 2025 йилгача мамлакатда электромобиллардан бошқа барча автомобиллар савдосининг тўхтатилиши режалаштирилган.

Bloomberg’нинг башорат қилишича, келгуси йилларда литиум-ионли батареялар нархи пасайиши натижасида 2023 йилга келиб электромобилларнинг нархи бензин ва дизель ёқилғиси билан ҳаракатланувчи автомобиллар нархлари билан тенглашади.

Аввалроқ Латвиянинг тўлиқ узатмали зирҳланган автомобилларни ишлаб чиқарувчи Dartz компанияси Nikrob компанияси билан бирлашиб, «Европадаги энг арзон автомобиль» дея эътироф этилаётган Freze Nikrob моделини тақдим этди. Машинанинг бошланғич нархи 10 минг еврони ташкил этади.

Шунингдек, Хитойда навбатдаги ҳамёнбоп электромобил сотувга чиқди. Уч эшикли Pocco Meimei модели интерьери ва экстерьеридаги ўзига хос дизайн, қўшимча ускуналар тўплами, шунингдек, арзонлиги билан кўпчиликни ҳайрон қолдирди: базавий электрокар нархи 4600 АҚШ долларини ташкил этади.