Rossiya o‘zining AQShdagi diplomatik vakolatxonasi rahbari Anatoliy Antonovni Moskvaga maslahatlashuvga taklif qilganiga javoban Vashington o‘z elchisi Jon Sallivanni Rossiyadan chaqirib olish niyatida emas. Bu haqda AQSh davlat departamentiga tayanib, “RBK” xabar berdi.
Avvalroq Vashington tomonidan bunday qaror qabul qilingani haqida CNN prezident ma’muriyatidagi ikkita manbaga asoslanib xabar bergan edi.
“Rossiyaning Antonovni Moskvadagi maslahatlashuvlarga taklif qilish to‘g‘risidagi qaroriga javoban elchi Sallivanni chaqirib olish niyatimiz yo‘q. U va AQShning boshqa fidoyi diplomatlari Rossiyada olib borayotgan faoliyatning har bir kuni Amerika manfaatlari va bizning ikki tomonlama munosabatlarimizni ta’minlash uchun juda muhimdir”, — dedi davlat departamenti Rossiya axborot agentligiga.
CNN AQSh Rossiyadagi elchisini almashtirmaslik qarori bilan o‘zaro munosabatlarda barqarorlikni mustahkamlashga tayyorligini namoyish etayotganini yozdi. Rossiyadagi vaziyatdan yaxshi xabardor bo‘lgan elchining mamlakatda qoldirilishi, shuningdek, prezident Vladimir Putinning iqlim o‘zgarishiga bag‘ishlangan konferensiyaga taklif qilinishi, AQSh ma’muriyati iloji boricha Rossiya bilan hamkorlik qilishga ochiq ekanidan dalolat beradi, deb ta’kidladi telekanal.
Sallivan 2020-yil fevralidan beri AQShning Rossiyadagi diplomatik vakolatxonasi rahbari bo‘lib ishlab kelmoqda. CNN xabar berishicha, prezident Jo Bayden hanuzgacha elchilarni tayinlash ustida ishlamoqda va ko‘plab o‘rinlarni to‘ldirishda bir qarorga kelmagan.
Rossiya elchisi Anatoliy Antonov 17-mart kuni Moskvaga maslahat uchun taklif qilingan edi. Elchi Bayden ABC News telekanaliga bergan intervyusida jurnalistning Putinni qotil deb bilasizmi, degan savoliga ijobiy javob berganidan keyin chaqirib olindi.
Rossiya Tashqi ishlar vazirligi elchining chaqirilishiga izoh berib, mamlakatlar “qiyin ahvolda bo‘lgan rus-amerika aloqalarini tuzatish yo‘llarini” belgilashi kerakligini aytdi. Vazirlik vakili Mariya Zaxarova Moskva Rossiya–Amerika munosabatlarining “qaytarilmas tanazzulga uchrashidan” manfaatdor emasligini ta’kidlab, bu masala Antonov bilan maslahatlashuv mavzusi bo‘lishini aytdi. Diplomat 20-mart kuni AQShdan jo‘nab ketdi.
Moskvaga kelganidan so‘ng elchi ham Rossiya Moskva va Vashington o‘rtasidagi munosabatlarni “butunlay tubsizlikka tushib qolishidan” manfaatdor emasligini ma’lum qilgan.
Rossiya Tashqi ishlar vazirligining ma’lum qilishicha, yaqin kelajakda Antonov Vashingtonga qaytmasligi mumkin. “Bu erta-indin hal bo‘ladigan masala emas. Elchining qaytish vaqti Vashington ikki tomonlama yo‘lda qanday qadamlar tashlashiga qarab belgilanadi”, — dedi vazir o‘rinbosari Sergey Ryabkov.
Uning so‘zlariga ko‘ra, Antonov o‘zi chaqirib olinishiga sabab bo‘lgan Moskvadagi maslahatlarini hali tugatmagan. “Kecha u shu haftaga rejalashtirilgan qo‘shimcha uchrashuvlardan ba’zilarini o‘tkazdi”, — dedi Ryabkov jurnalistlarga.
Avvalroq Bloomberg AQSh rossiyalik diplomatlarni mamlakatdan chiqarib yuborishi va Moskvaga qarshi yangi sanksiyalar kiritishi mumkinligi haqida yozgandi. Moskva, o‘z navbatida, AQShning har qanday dushmanlik harakatlariga javob qaytarishini ma’lum qilgan.
Izoh (0)