Turkiya koronavirus pandemiyasining eng qiyin davrlardan birini boshdan kechirmoqda. Bu haqda mamlakat sog‘liqni saqlash vaziri Faxriddin Kojaga tayanib, “RBK” xabar berdi.
“Statistika va jamiyatda pasayib borayotgan psixologik qarshilikni hisobga olgan holda, mamlakatimiz pandemiyadagi eng qiyin davrlardan birini boshdan kechirmoqda, deyish mumkin. Biz pandemiyaning yangi cho‘qqisidamiz”, — dedi vazir.
Vazir mamlakatning barcha hududlarida kasallanish o‘sib borayotganini ta’kidladi. Hukumat ma’lumotlariga ko‘ra, aholining 80 foizi infeksiyani yuqtirish xavfi yuqori bo‘lgan shaharlarda yashaydi. 10-aprelga kelib mamlakatda COVID-19 bilan kasallanganlarning umumiy soni 3 million kishidan oshgan. Mamlakatda sutkalik yuqtirish holatlari 1-mart kuni qariyb 10 ming kishida qayd etilgan bo‘lsa, 7-apreldan boshlab bu ko‘rsatkich 50 ming kishidan pastga tushmagan. So‘nggi bir hafta ichida mamlakatda deyarli 500 ming kishida koronavirus aniqlangan.
Vazirning ta’kidlashicha, Turkiyada intensiv terapiya bo‘limlarida kasallanganlar soni hali keskin o‘smayapti, ammo statistika “o‘sish xavfidan ogohlantirmoqda”.
Turkiya Sog‘liqni saqlash vazirligi rahbari vaziyatni yomonlashtirayotgan ikkita asosiy omilni sanab o‘tdi. Xususan, aholining virusga qarshi kurash paytida keskinlik va noaniqlikdan charchagani hamda infeksiyaning mutatsiyalarga uchragani. Kojaning qo‘shimcha qilishicha, ko‘p hollarda Turkiyada koronavirusning “britancha” shtammi aniqlanmoqda.
Shuningdek, vazir Turkiyaning 7,5 million aholisi koronavirusga qarshi vaksinaning har ikkala dozasi bilan emlanganini ta’kidladi. “Turkiya dunyo bo‘ylab emlash sur’ati eng yuqori bo‘lgan oltinchi mamlakatdir”, — dedi Koja. Uning aytishicha, mutaxassislar hukumatga mavjud vaziyat bilan bog‘liq cheklovlarni kiritish taklifi bilan chiqdi.
Faxriddin Koja Turkiyadagi COVID-19 bilan bog‘liq vaziyatni baholash uchun mamlakatga Rossiya delegatsiyasining tashrif buyurishini ma’lum qildi.
“Rossiya delegatsiyasi tez orada Turkiyaning sayyohlar orasida mashhur bo‘lgan hududlaridagi koronavirusga qarshi kurashish bo‘yicha xavfsizlik choralarini baholash uchun keladi”, — dedi Sog‘liqni saqlash vazirligi rahbari.
U bunday tekshiruvdan so‘ng Rossiya tomonining pozitsiyasi o‘zgarishi mumkinligiga umid bildirdi. Avvalroq Rossiya 15-apreldan 1-iyungacha Turkiyaga doimiy va charter reyslarni to‘xtatishi haqida e’lon qilgandi.
Turkiya 2020-yilning mart oyida COVID-19 tufayli yopilganidan so‘ng Rossiya Federatsiyasi mamlakat bilan doimiy parvozlarni tiklashga ruxsat bergan birinchi davlatlardan biri bo‘lgan. 1-avgustdan Anqara va Istanbulga, 10-avgustdan Antaliya, Bodrum va Dalaman kurortlariga parvoz uchun ruxsat berilgandi.
“Rospotrebnadzor” rahbari Anna Popovaning ta’kidlashicha, Rossiyaga chetdan kirib kelayotgan koronavirus shtammlarining aksariyati Turkiyaga to‘g‘ri kelmoqda.
Shuningdek, Rossiya bilan bir qatorda Xitoy va boshqa mamlakatlar ham Turkiya bilan parvozlarni to‘xtatishga qaror qildi.
Xitoyning fuqaro aviatsiyasi ma’muriyati (CAAC) turk aviakompaniyalariga 19-apreldan boshlab to‘rt hafta davomida parvozlarni to‘xtatishga buyruq berilganini e’lon qildi.
O‘zbekiston Turkiya bilan parvozlarni hali to‘xtatmagan. Mart oyining oxirida Samarqand—Istanbul—Samarqand yo‘nalishi bo‘yicha muntazam reyslar tiklangan edi.
Izoh (0)