Misrning Ismoiliya shahri iqtisodiy ishlar bo‘yicha sudi Suvaysh kanalini qariyb bir haftaga to‘sib qo‘ygan Ever Given konteyner tashuvchi kemasini musodara qilishga qaror qildi. 900 million dollar miqdorida tovon puli to‘lamaguncha, kema egasi uni olib ketolmaydi, deb yozadi “Korrespondent.net”.
“Sud qaroriga binoan kema musodara qilinadi va sud nazorati ostida bo‘ladi. Suvaysh kanali ma’muriyatiga 900 million dollar tovon puli to‘lanmaguncha, kema operatoriga kemani tasarruf etish taqiqlanadi”, — deyiladi sud qarorining xabarida.
Kompensatsiya tarkibiga Ever Given’ni sayozlikdan chiqarib olish, konteyner kemasini ta’mirlash, shuningdek, kanalning to‘sib qo‘yilishi oqibatida yetkazilgan zararni qoplash xarajatlari kiritilgan.
Sud da’vosi Suvaysh kanali ma’muriyatiga maxsus sud tomonidan kemani musodara qilishga ruxsat beruvchi Misr dengiz savdosi to‘g‘risidagi qonunning tegishli moddasiga asoslanadi.
Suvaysh kanali ma’muriyati rahbari Usama Rabi, o‘z navbatida, Youm7 gazetasiga ushbu voqea bo‘yicha tekshiruv natijalari payshanba kuni e’lon qilinishini aytdi.
Avvalroq Ever Given konteyner tashuvchi kemasi bilan yuz bergan voqeaga inson xatosi sabab bo‘lgani aytilgan edi.
Eslatib o‘tamiz, 23-mart kuni Ever Given kemasi kuchli shamol va qum bo‘roni tufayli yo‘nalishini o‘zgartirib, burun va quyruq qismlari bilan ikkala qirg‘oqqa tiralib qolib, Suvaysh kanalining bir magistralli janubiy qismini to‘sib qo‘ygan edi. Buning natijasida 450 dan ortiq kemadan iborat tirbandlik yuzaga kelgan. Shuningdek, hodisa ortidan neft narxi keskin o‘sgan.
Suvaysh kanali orqali ikki yo‘nalishda ham kemalar harakati 29-mart, dushanba oqshomidan qayta tiklandi.
Avvalroq Suvaysh kanalining to‘silib qolishi oqibatida yetgan zarar 1 milliard dollarga baholangani haqida xabar berilgandi. Kanal ma’muriyati bo‘lib o‘tgan hodisada Ever Given kemasi kapitanini aybdor deb topdi. Kemaning egasi esa ishni sudga oshirmaslik uchun zararni qoplab bermoqchiligini ma’lum qildi.
Izoh (0)