Jismoniy tarbiya va sport vazirining sobiq birinchi o‘rinbosari, O‘zbekiston futbol assotsiatsiyasi birinchi vitse-prezidenti Ravshan Ermatov Milliy Olimpiya qo‘mitasi (MOQ) raisining birinchi o‘rinbosari lavozimiga saylandi. Bu haqda sport vazirligi matbuot xizmati ma’lum qildi.
12-aprel kuni MOQda navbatdan tashqari yig‘ilish bo‘lib o‘tgan. Unda qo‘mitaga yangi o‘rinbosar saylash masalasi ko‘rib chiqilgan.
Ushbu lavozimga Ravshan Ermatov nomzodi ilgari surilgan. Kengash a’zolari bir ovozdan Ermatov nomzodini ma’qullagan. Ermatov MOQ raisi Rustam Shoabdurahmonovga yordam beradi.
Shu tariqa sobiq futbol hakami bir yo‘la ikki lavozimda faoliyatini davom ettiradigan bo‘ldi. Avvalroq funksioner Prezident farmoniga ko‘ra Jismoniy tarbiya va sport vaziri birinchi o‘rinbosari lavozimini tark etgandi.
Eslatib o‘tamiz, sobiq FIFA hakami Ravshan Ermatov 2019-yilning iyun oyida O‘zbekiston futbol assotsiatsiyasi vitse-prezidenti etib tayinlangandi. O‘sha yilning noyabrida esa hakamlik faoliyatini rasman yakunlagandi.
Ma’lumot uchun, Ravshan Ermatov 1977-yil 9-avgust kuni Toshkent shahrida tug‘ilgan. Futbolchi sifatida Toshkent viloyatining “G‘azalkent” klubida to‘p surgan. Og‘ir jarohat tufayli futbolchilik faoliyatiga yakun yasab, hakamlikka o‘tgan. 25 yoshida FIFA hakamiga aylangan.
U besh marta Osiyo qit’asining eng yaxshi hakami deb topilgan. “O‘zbekiston Iftixori” ko‘krak nishoni, “El-yurt hurmati” va “Buyuk xizmatlari uchun” ordenlari bilan taqdirlangan.
Ermatov Jahon chempionati final bosqichida eng ko‘p o‘yin boshqargan hakam hisoblanadi. U mundialda 11 ta o‘yinda bosh hakam bo‘lib ishlagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)