Жисмоний тарбия ва спорт вазирининг собиқ биринчи ўринбосари, Ўзбекистон футбол ассоциацияси биринчи вице-президенти Равшан Эрматов Миллий Олимпия қўмитаси (МОҚ) раисининг биринчи ўринбосари лавозимига сайланди. Бу ҳақда спорт вазирлиги матбуот хизмати маълум қилди.
12 апрель куни МОҚда навбатдан ташқари йиғилиш бўлиб ўтган. Унда қўмитага янги ўринбосар сайлаш масаласи кўриб чиқилган.
Ушбу лавозимга Равшан Эрматов номзоди илгари сурилган. Кенгаш аъзолари бир овоздан Эрматов номзодини маъқуллаган. Эрматов МОҚ раиси Рустам Шоабдураҳмоновга ёрдам беради.
Шу тариқа собиқ футбол ҳаками бир йўла икки лавозимда фаолиятини давом эттирадиган бўлди. Аввалроқ функционер Президент фармонига кўра Жисмоний тарбия ва спорт вазири биринчи ўринбосари лавозимини тарк этганди.
Эслатиб ўтамиз, собиқ ФИФА ҳаками Равшан Эрматов 2019 йилнинг июнь ойида Ўзбекистон футбол ассоциацияси вице-президенти этиб тайинланганди. Ўша йилнинг ноябрида эса ҳакамлик фаолиятини расман якунлаганди.
Маълумот учун, Равшан Эрматов 1977 йил 9 август куни Тошкент шаҳрида туғилган. Футболчи сифатида Тошкент вилоятининг «Ғазалкент» клубида тўп сурган. Оғир жароҳат туфайли футболчилик фаолиятига якун ясаб, ҳакамликка ўтган. 25 ёшида ФИФА ҳакамига айланган.
У беш марта Осиё қитъасининг энг яхши ҳаками деб топилган. «Ўзбекистон Ифтихори» кўкрак нишони, «Эл-юрт ҳурмати» ва «Буюк хизматлари учун» орденлари билан тақдирланган.
Эрматов Жаҳон чемпионати финал босқичида энг кўп ўйин бошқарган ҳакам ҳисобланади. У мундиалда 11 та ўйинда бош ҳакам бўлиб ишлаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)